తుఫాన్ ప్రభావిత ప్రాంతాల్లో విద్యుత్ పునరుద్ధరణ పనుల పరిశీలన

సూర్య ప్రతినిధి, ఒంగోలు : 

 మురసు తుఫాన్ ప్రభావంతో దెబ్బతిన్న విద్యుత్ వ్యవస్థను సాధ్యమైనంత త్వరగా పునరుద్ధరించేందుకు విద్యుత్ శాఖ చర్యలు ముమ్మరం చేసింది. ఇందులో భాగంగా APCPDCL డైరెక్టర్ (ప్రాజెక్ట్స్ అండ్ హెచ్‌ఆర్‌డీ) టీవీఎస్ఎన్ మూర్తి బుధవారం ప్రకాశం జిల్లాలోని ఉప్పుగుండూరు, అమ్మనబ్రోలు, కనపర్తి, వి.ఆర్.పాలెం తదితర గ్రామాల్లో పర్యటించి విద్యుత్ పునరుద్ధరణ పనులను క్షేత్రస్థాయిలో పరిశీలించారు. తుఫాన్ ధాటికి దెబ్బతిన్న విద్యుత్ లైన్లు, పంపిణీ ట్రాన్స్‌ఫార్మర్లు (డీటీఆర్‌లు), వ్యవసాయ పొలాల్లో నేలకొరిగిన విద్యుత్ స్తంభాలు, తెగిపడిన వైర్లను పరిశీలించి నష్టాన్ని, పునరుద్ధరణ పనుల పురోగతిని అధికారులను అడిగి తెలుసుకున్నారు. విద్యుత్ సరఫరా పునరుద్ధరణ పనులు చేపడుతున్న ప్రాంతాల్లో సిబ్బందితో కలిసి పర్యటిస్తూ పనుల వేగాన్ని సమీక్షించారు. విద్యుత్ సరఫరా పునరుద్ధరణలో ఎలాంటి జాప్యం లేకుండా అవసరమైన సిబ్బంది, సామగ్రిని సమకూర్చుకుని పనులను వేగవంతంగా పూర్తి చేయాలని అధికారులకు సూచించారు. ముఖ్యంగా వ్యవసాయ పంట పొలాలకు విద్యుత్ సరఫరాను వీలైనంత త్వరగా పునరుద్ధరించాలని ఆదేశించారు. తుఫాన్ కారణంగా రైతులు, ప్రజలు ఇబ్బందులు ఎదుర్కోకుండా విద్యుత్ వ్యవస్థను యథాస్థితికి తీసుకురావడంపై ప్రత్యేక దృష్టి సారించాలని స్పష్టం చేశారు.