తిరువూరు టీడీపీ వివాదంపై పల్లా ఆరా

నేతలను పిలిపించి వివరణ తీసుకున్న రాష్ట్ర అధ్యక్షుడు పల్లా

 టోల్‌ప్లాజా ఘటనపై చింతమనేని ప్రభాకర్‌ నుండి వివరణ తీసుకున్న పల్లా

సూర్య స్టేట్ బ్యూరో, అమరావతి : 

 తిరువూరులో టీడీపీ నేతల మధ్య వివాదం, దెందులూరులో టోల్ ప్లాజా ఘటనలపై తెలుగుదేశం పార్టీ రాష్ట్ర అధ్యక్షుడు పల్లా శ్రీనివాసరావు విచారణ జరిపారు. ముందుగా తిరువూరు నియోజకవర్గంలో ఎమ్మెల్యే కొలికపూడి శ్రీనివాసరావు, సామాజిక సంక్షేమ బోర్డు చైర్మన్ బాలకోటయ్య మధ్య నెలకొన్న వివాదంపై టీడీపీ రాష్ట్ర అధ్యక్షుడు పల్లా శ్రీనివాసరావు పార్టీ కేంద్ర కార్యాలయంలో ఇరువురితో విడివిడిగా సమావేశమయ్యారు. పరస్పరం చేసుకున్న ఆరోపణలు, పార్టీ అధిష్ఠానానికి అందిన ఫిర్యాదులపై ఇరువురి నుంచి వివరాలు, వివరణ కోరారు. పార్టీ అంతర్గత వ్యవహారాలను సామరస్యపూర్వకంగా పరిష్కరించుకోవాలని సూచించారు.అదేవిధంగా దెందులూరు ఎమ్మెల్యే చింతమనేని ప్రభాకర్‌పై టోల్‌ప్లాజా ఘటనకు సంబంధించి వచ్చిన ఆరోపణలపైనా పల్లా ఆరా తీశారు. టోల్‌ప్లాజా సిబ్బంది, లారీ డ్రైవర్లు ఇచ్చిన వివరణలను పరిగణనలోకి తీసుకుని ఘటనకు సంబంధించిన వాస్తవాలను అడిగి తెలుసుకున్నారు. టోల్‌ప్లాజా ఘటనతో ఎమ్మెల్యే చింతమనేని ప్రభాకర్‌కు సంబంధం లేదని సంబంధిత డ్రైవర్లు, సిబ్బంది స్పష్టం చేసిన నేపథ్యంలో ఈ అంశంపై పూర్తి వివరాలను పల్లా తెలుసుకున్నారు. వ్యక్తిగత విమర్శలు, పరస్పర ఆరోపణలకు దూరంగా ఉంటూ పార్టీ క్రమశిక్షణ, ఐక్యతను కాపాడాలని నేతలకు పల్లా సూచించారు.