తెలుగుదేశం పార్టీ ఇచ్చే 34 శాతం రిజర్వేషన్లు బీసీల రాజకీయ సాధికారతకు చారిత్రాత్మక నిర్ణయం

ముఖ్యమంత్రి శ్రీ నారా చంద్రబాబు నాయుడు గారు, మంత్రి శ్రీ నారా లోకేష్ గారికి అభినందనలు  – శ్రీ డా. బీద మస్తాన్ రావు యాదవ్, రాజ్యసభ సభ్యులు, నెల్లూరు

నెల్లూరు, మేజర్ న్యూస్ :    స్థానిక సంస్థల ఎన్నికల్లో తెలుగుదేశం పార్టీ బీసీలకు 34 శాతం రిజర్వేషన్లు కల్పించే దిశగా ముఖ్యమంత్రి శ్రీ నారా చంద్రబాబు నాయుడు గారు, గౌరవ మంత్రి శ్రీ నారా లోకేష్ గారు తీసుకున్న నిర్ణయం అభినందనీయం.     బీసీల రాజకీయ సాధికారత, ఆత్మగౌరవం, సామాజిక న్యాయం పట్ల తెలుగుదేశం పార్టీకి ఉన్న నిబద్ధతకు ఈ నిర్ణయం నిదర్శనం. బీసీల అభ్యున్నతి కోసం నిరంతరం కృషి చేస్తున్న ముఖ్యమంత్రి గారికి, మంత్రి శ్రీ నారా లోకేష్ గారికి నా హృదయపూర్వక అభినందనలు, కృతజ్ఞతలు.   చట్టపరంగా బీసీలకు న్యాయం చేయలేకపోయినా, పార్టీ పరంగా బీసీలకు న్యాయం చేస్తాం:   వైసీపీ నేతలు కోర్టుకు వెళ్లి 34% రిజర్వేషన్లను అడ్డుకుని బీసీలకు తీరని ద్రోహం చేశారు. బీసీలు రాజకీయంగా, సామాజికంగా ఎదగకూడదని గొడ్డలి పార్టీ నేతలు కుట్రలు చేస్తున్నారు. బీసీలకు న్యాయం చేయాలన్నదే టీడీపీ లక్ష్యం.  వారి హక్కులను అడ్డుకోవడమే వైసీపీ వైఖిరి.    బీసీలకు 34% రిజర్వేషన్ అంశాన్ని వైసీపీ హయాంలో హైకోర్టు కొట్టివేస్తే సుప్రీంకోర్టుకు వెళ్లకుండా వదిలేసి బీసీలకు తీరని అన్యాయం చేశారు. తెలుగుదేశం పార్టీ చిత్తశుద్ధితో సుప్రీంకోర్టు వరకు వెళ్లి బీసీలకు న్యాయం చేసేందుకు కృషి చేయడం జరిగింది. బీసీ మంత్రుల బృందం కూడా ఢిల్లీ వెళ్లి సుప్రీంకోర్టు సీనియర్ న్యాయవాదులతో చర్చించడం మా నిబద్ధతకు నిదర్శనం. రిజర్వేషన్లను 50% పరిమితికి పెంచేందుకు అవసరమైన సమాచారాన్ని కూడా అందించడం జరిగింది. సుప్రీంకోర్టు తీర్పును గౌరవిస్తూ 34% రిజర్వేషన్లను పార్టీ నుంచి ఇస్తాం. బీసీల అభ్యున్నతి, సామాజిక న్యాయం తెలుగుదేశం పార్టీతోనే సాధ్యం.

బీసీలకు అండగా తెలుగుదేశం పార్టీ  :    తెలుగుదేశం పార్టీ ఆవిర్భావం నుంచి బీసీల అభ్యున్నతికి ప్రత్యేక ప్రాధాన్యత ఇస్తూ వస్తోంది. 1987లో స్థానిక సంస్థల్లో బీసీలకు 20 శాతం రిజర్వేషన్లు కల్పించడం, 1995లో వాటిని 34 శాతానికి పెంచడం బీసీల రాజకీయ సాధికారత దిశగా కీలకమైన ముందడుగులు. ఈ చారిత్రాత్మక నిర్ణయాలు బీసీ వర్గాలకు ప్రజాప్రతినిధులుగా ఎదిగే అవకాశాలను విస్తరించాయి. అదే స్ఫూర్తితో నేడు బీసీలకు 34 శాతం రిజర్వేషన్లు కల్పించేందుకు మా నాయకత్వం తీసుకున్న చొరవ అభినందనీయం.  ఈ నిర్ణయం అమలులోకి వస్తే గ్రామ పంచాయతీలు, మండల పరిషత్‌లు, జిల్లా పరిషత్‌లు, మున్సిపాలిటీలు తదితర స్థానిక సంస్థల్లో బీసీల ప్రాతినిధ్యం మరింత బలోపేతమవుతుంది. తద్వారా బీసీ వర్గాల సమస్యలు, అవసరాలు పాలనలో తగిన ప్రాధాన్యత పొందడంతో పాటు, ప్రజాస్వామ్య వ్యవస్థలో వారి భాగస్వామ్యం పెరుగుతుంది. రాజకీయంగా బీసీ యువతకు నాయకత్వ అవకాశాలు లభించి, తమ సమాజ అభివృద్ధిలో కీలక పాత్ర పోషించే అవకాశం ఏర్పడుతుంది.  బీసీలకు న్యాయం చేయాలనే సంకల్పంతో, వారి హక్కులను పరిరక్షించేందుకు ముఖ్యమంత్రి శ్రీ నారా చంద్రబాబు నాయుడు గారు తీసుకుంటున్న చొరవ ప్రశంసనీయం. మంత్రి శ్రీ నారా లోకేష్ గారు బీసీ వర్గాల ఆకాంక్షలకు ప్రాధాన్యతనిస్తూ, వారి భవిష్యత్తుకు భరోసా కల్పించే దిశగా కృషి చేస్తున్నందుకు బీసీల తరుపున మా ధన్యవాదాలు.