తరుణవాయ మోడల్ ప్రైమరీ స్కూల్‌లో ఘనంగా బాలల దినోత్సవ వేడుకలు
సంగం, మేజర్ న్యూస్ : సంగం మండలం తరుణవాయ మోడల్ ప్రైమరీ స్కూల్‌లో శుక్రవారం బాలల దినోత్సవ వేడుకలు అంగరంగ వైభవంగా నిర్వహించారు. పాఠశాల ప్రధానోపాధ్యాయురాలు ఏ . సునీల ఆధ్వర్యంలో జరిగిన ఈ వేడుకల్లో విద్యార్థులు ఉత్సాహంగా పాల్గొన్నారు. భారతదేశ తొలి ప్రధానమంత్రి, పిల్లలంటే అమితమైన ప్రేమ కలిగిన పండిట్ జవహర్‌లాల్ నెహ్రూ జయంతిని పురస్కరించుకుని ఆయన చిత్రపటానికి నివాళులర్పించారు. ఈ సందర్భంగా నెహ్రూ జీవిత విశేషాలు, బాలల పట్ల ఆయనకున్న ప్రేమానురాగాలు, దేశాభివృద్ధికి ఆయన చేసిన సేవలను ఉపాధ్యాయులు విద్యార్థులకు వివరించారు. అనంతరం విద్యార్థుల్లో ఉత్సాహం, పోటీతత్వం, సృజనాత్మకతను పెంపొందించే లక్ష్యంతో వివిధ రకాల ఆటల పోటీలు నిర్వహించారు. చిన్నారులు ఎంతో ఉత్సాహంగా పోటీల్లో పాల్గొని తమ ప్రతిభను చాటుకున్నారు. వేడుకల్లో భాగంగా విద్యార్థులకు పాయసం, చాక్లెట్లు పంపిణీ చేశారు. ఆటపాటలు, నవ్వులు, ఆనందోత్సాహాల మధ్య పాఠశాల ప్రాంగణం సందడిగా మారింది. ఈ కార్యక్రమంలో పాఠశాల ఉపాధ్యాయులు, విద్యార్థినులు పాల్గొని చిన్నారులతో కలిసి బాలల దినోత్సవ వేడుకలను ఆనందంగా జరుపుకున్నారు.
