స్వచ్ఛమైన ఓటరు జాబితాతోనే బలమైన ప్రజాస్వామ్యం

                                       విద్యార్థులకు ఎన్నికల ప్రక్రియపై అవగాహన

కొత్తపేట,మేజర్ న్యూస్:ప్రజాస్వామ్య వ్యవస్థ పటిష్టతకు స్వచ్ఛమైన ఓటరు జాబితా ఎంతో కీలకమని కొత్తపేట వికెవి ప్రభుత్వ డిగ్రీ కళాశాల ప్రిన్సిపాల్ డాక్టర్ కె.పి.రాజు అన్నారు.ఎన్నికల ప్రక్రియ,ఓటు హక్కు ప్రాధాన్యతపై విద్యార్థులకు అవగాహన కల్పించేందుకు గురువారం కళాశాలలో ప్రత్యేక కార్యక్రమాలు నిర్వహించారు.ఆంధ్రప్రదేశ్ ప్రధాన ఎన్నికల అధికారి ఆదేశాల మేరకు నవంబర్ 2 నుంచి 20వ తేదీ వరకు రాష్ట్రవ్యాప్తంగా కళాశాలల్లో నిర్వహిస్తున్న ఎలక్టోరల్ లిటరసీ క్లబ్స్ కార్యక్రమాల్లో భాగంగా ఈ కార్యక్రమాలు చేపట్టారు.ఇందులో భాగంగా మధ్యాహ్నం 12 నుంచి 1 గంట వరకు 'స్వచ్ఛమైన ఓటరు జాబితా ప్రాముఖ్యత' అనే అంశంపై అవగాహన సదస్సు నిర్వహించారు.ఈ సదస్సులో 40 మంది విద్యార్థులు పాల్గొన్నారు.అనంతరం మధ్యాహ్నం 3 నుంచి 4 గంటల వరకు 'ఎన్నికల ప్రక్రియ' అంశంపై క్విజ్ పోటీలు నిర్వహించగా 50 మంది విద్యార్థులు ఉత్సాహంగా పాల్గొన్నారు.ఈ సందర్భంగా ప్రిన్సిపాల్ మాట్లాడుతూ ప్రజాస్వామ్యంలో ఎన్నికల పాత్ర,ఓటరు జాబితా ప్రాముఖ్యత,ఓటు హక్కు వినియోగంపై ప్రతి ఒక్కరికీ అవగాహన అవసరమన్నారు.ముఖ్యంగా యువత ఎన్నికల ప్రక్రియపై పూర్తి అవగాహన పెంపొందించుకుని ప్రజాస్వామ్య విలువల పరిరక్షణలో భాగస్వాములు కావాలని పిలుపునిచ్చారు.క్విజ్ పోటీల్లో ప్రతిభ కనబరిచిన ఇద్దరు విద్యార్థులను నియోజకవర్గ స్థాయిలో నిర్వహించే తదుపరి పోటీలకు ఎంపిక చేసినట్లు నిర్వాహకులు వెల్లడించారు.ఈ కార్యక్రమాల్లో కళాశాల అధ్యాపకులు,ఎలక్టోరల్ లిటరసీ క్లబ్ సభ్యులు,విద్యార్థులు తదితరులు పాల్గొన్నారు.