సీఎం చంద్రబాబుతో మంత్రి నారాయణ భేటీ: రాజధాని భూములపై కీలక చర్చ

 అమరావతి :రాష్ట్ర కేబినెట్ సమావేశం ముగిసిన అనంతరం ముఖ్యమంత్రి నారా చంద్రబాబు నాయుడితో పురపాలక, పట్టణాభివృద్ధి శాఖ మంత్రి పొంగూరు నారాయణ ప్రత్యేకంగా సమావేశమయ్యారు. రాజధాని అమరావతి పరిధిలోని కేటగిరి-4 భూములు మరియు దేవాదాయ (ఎండోమెంట్) భూములకు సంబంధించిన పలు అంశాలపై ఈ భేటీలో ప్రధానంగా చర్చించారు.

భూముల కేటాయింపులు, వినియోగం మరియు ఎదురవుతున్న చిక్కులకు సంబంధించి పలు వివరాలను సీఎం దృష్టికి మంత్రి నారాయణ తీసుకెళ్లారు. ఈ అంశాలపై సమగ్రంగా పరిశీలించిన ముఖ్యమంత్రి, దేవాదాయ మరియు కేటగిరి-4 భూములకు సంబంధించిన న్యాయపరమైన కోణాలను పూర్తిస్థాయిలో అధ్యయనం చేయాలని ఆదేశించారు. అన్ని న్యాయపరమైన అంశాలు, నిబంధనలను స్పష్టంగా చర్చించిన తర్వాతే తుది నిర్ణయం తీసుకుందామని పేర్కొంటూ, ఈ అంశాన్ని మరోసారి తన దృష్టికి తీసుకురావాలని మంత్రి నారాయణకు సూచించారు.