సత్తప్ప నాయుడు సేవలు అభినందనీయం

పదవీ విరమణ సందర్భంగా ఘన సత్కారం

నిబద్ధతతో విధులు నిర్వర్తించారన్న కమిషనర్‌ సత్యనారాయణ

కాకినాడ, సెప్టెంబరు 30: కాకినాడ నగరపాలక సంస్థలో శానిటేషన్‌ సూపర్‌వైజర్‌గా పనిచేస్తూ పదవీ విరమణ పొందిన జి.సత్తప్ప నాయుడును అధికారులు, ఉద్యోగులు ఘనంగా సత్కరించారు. కార్పొరేషన్‌ కార్యాలయంలో అదనపు కమిషనర్‌ కే.టి.సుధాకర్‌ అధ్యక్షతన మంగళవారం వీడ్కోలు కార్యక్రమం నిర్వహించారు.

కమిషనర్‌ ఎన్‌.వి.వి.సత్యనారాయణ మాట్లాడుతూ నగర పారిశుద్ధ్య నిర్వహణలో సత్తప్ప నాయుడు నిబద్ధతతో పనిచేశారని, ఆయన సేవలు అభినందనీయమన్నారు. ఉద్యోగులు ప్రజాసేవను బాధ్యతగా భావించి విధులు నిర్వర్తించాలని సూచించారు. పదవీ విరమణ అనంతరం కుటుంబ సభ్యులతో ఆయురారోగ్యాలతో ఆనందంగా గడపాలని ఆకాంక్షించారు. అదనపు కమిషనర్‌ సుధాకర్‌ ఆయన సేవలను అభినందించి శుభాకాంక్షలు తెలిపారు.

కార్యక్రమంలో తాడేపల్లిగూడెం కమిషనర్‌ ఏసుబాబు, హెల్త్‌ ఆఫీసర్‌ డాక్టర్‌ పృథ్వీచరణ్‌, డిప్యూటీ కమిషనర్‌ కె.శ్రీనివాస్‌, ముమ్మిడివరం కమిషనర్‌ వర్మ, ఎస్‌ఈ పి.వెంకట్రావు, ఈఈలు కనకారావు, మాచరాజు, శానిటేషన్‌ సూపర్‌వైజర్‌ రాంబాబు, శానిటరీ ఇన్‌స్పెక్టర్లు, కార్పొరేషన్‌ ఉద్యోగులు పాల్గొన్నారు.