సమస్యాత్మక పోలింగ్ కేంద్రాలను గుర్తించి పటిష్ట భద్రతా చర్యలు చేపట్టాలి..జిల్లా ఎన్నికల పరిశీలకురాలు పి ప్రశాంతి, ఐఏఎస్

అమలాపురం మేజర్ న్యూస్ :ఎంపీటీసీ, జడ్పీటీసీ ఎన్నికల పోలింగ్ సజావుగా, ప్రశాంత వాతావరణంలో జరిగేలా సమస్యాత్మక, సున్నితమైన పోలింగ్ కేంద్రాలను ముందుగానే గుర్తించి పటిష్ట భద్రతా చర్యలు చేపట్టాలని జిల్లా ఎన్నికల సాధారణ పరిశీలకురాలు పి. ప్రశాంతి, ఐఏఎస్ అధికారులను ఆదేశించారు.
బుధవారం డాక్టర్ బి.ఆర్. అంబేద్కర్ కోనసీమ జిల్లాలోని మలికిపురం మండలం లక్కవరం గ్రామంలో దొడ్డ ఫంక్షన్ హాల్‌లో ఏర్పాటు చేసిన డిస్ట్రిబ్యూషన్ కేంద్రాన్ని ఆమె తనిఖీ చేశారు. ఈ సందర్భంగా పోలింగ్ నిర్వహణకు చేపట్టిన ఏర్పాట్లు, పోలింగ్ సిబ్బందికి అవసరమైన సదుపాయాలు, పోలీసు భద్రతా చర్యలు, పోలింగ్ కేంద్రాల్లో టేబుళ్ల ఏర్పాటు తదితర అంశాలపై అధికారులను అడిగి వివరాలు తెలుసుకున్నారు.
ఈ సందర్భంగా జిల్లా ఎన్నికల సాధారణ పరిశీలకురాలు మాట్లాడుతూ, ఎంపీటీసీ, జడ్పీటీసీ ఎన్నికల పోలింగ్ నిర్వహణలో ఎలాంటి అవాంఛనీయ సంఘటనలకు తావులేకుండా ముందస్తు జాగ్రత్తలు తీసుకోవాలని సూచించారు. సమస్యాత్మక, సున్నితమైన పోలింగ్ కేంద్రాలపై ప్రత్యేక దృష్టి సారించి, ఎన్నికల ప్రవర్తనా నియమావళిని పకడ్బందీగా అమలు చేయాలని తెలిపారు. పోలింగ్ కేంద్రాల వద్ద అవసరమైన పోలీసు బందోబస్తు ఏర్పాటు చేయడంతో పాటు, సీసీటీవీ కెమెరాల ద్వారా పర్యవేక్షణ చేపట్టి ఎన్నికల ప్రక్రియ పారదర్శకంగా, ప్రశాంతంగా జరిగేలా చర్యలు తీసుకోవాలని అధికారులకు సూచించారు.
ఈ తనిఖీలో సర్వే అండ్ ల్యాండ్స్ ఏడీ డి. ప్రభాకర్ రావు, మలికిపురం తహసీల్దార్ కె. రాజకిషోర్, ఎన్నికల సిబ్బంది తదితరులు పాల్గొన్నారు.