రుయాలో కోటితో అదనపు క్యాజువాలిటీ బ్లాక్ -జెఎంసి ట్రస్ట్ 50 లక్షలు, కలెక్టర్ నిధుల నుండి 50 లక్షలు మంజూరు -భూమి పూజ చేసిన ఎమ్మెల్యే ఆరణి, జిల్లా కలెక్టర్

ఎడ్యుకేషన్ స్టాఫ్ రిపోర్టర్ : రుయా ప్రభుత్వ జనరల్ ఆసుపత్రిలో అత్యవసర వైద్య సేవలను బలోపేతం చేసేందుకు రూ.కోటి వ్యయంతో 15 పడకల అదనపు ఎమర్జెన్సీ బ్లాక్ నిర్మాణానికి భూమిపూజ చేశారు. మంగళవారం ఎమ్మెల్యే ఆరణి శ్రీనివాసులు, జిల్లా కలెక్టర్ డా.ఎస్.వెంకటేశ్వర్, సంయుక్తంగా ఆసుపత్రి ప్రాంగణంలో భవన నిర్మాణానికి శంకుస్థాపన చేశారు. ఈ బ్లాక్ నిర్మాణానికి ఎమ్మెల్యే ఆరణికి చెందిన జెఎంసి ట్రస్ట్ నుండి రూ.50 లక్షలు, మిగిలిన రూ.50 లక్షలను జిల్లా కలెక్టర్ నిధులు, ఆసుపత్రి అభివృద్ధి సంఘం, వైద్య కళాశాల అభివృద్ధి సంఘం, ఎన్టీఆర్ వైద్య సేవ నిధుల సమన్వయంతో సమకూర్చారు. సీఎం సూచించిన పి-4 విధానంలో ప్రజా భాగస్వామ్యంతో ఈ నిర్మాణం చేపట్టినట్లు తెలిపారు. ప్రస్తుతం క్యాజువాలిటీలో 25 పడకలు మాత్రమే ఉండగా, రోజుకు సుమారు 300 మంది రోగులు అత్యవసర వైద్యం కోసం వస్తున్నారని, ఒక్కో పడకపై 2-3 మందికి చికిత్స అందించాల్సి వస్తోందని ఎమ్మెల్యే, కలెక్టర్ పేర్కొన్నారు. భవిష్యత్తులో క్రిటికల్ కేర్ బ్లాక్‌లో 100 పడకల ప్రణాళిక ఉన్నా, అది 3-4 ఏళ్లు పడుతుందని, అందుకే తక్షణ అవసరాల కోసం ఈ 15 పడకల బ్లాక్‌ను 4-5 నెలల్లో పూర్తి చేసి అందుబాటులోకి తెస్తామని స్పష్టం చేశారు. పేద, మధ్యతరగతి ప్రజలకు సకాలంలో వైద్యం అందించడమే లక్ష్యమని ఎమ్మెల్యే ఆరణి తెలిపారు. ఈ కార్యక్రమంలో టీటీడీ బోర్డు సభ్యుడు భానుప్రకాష్ రెడ్డి, డీఎంహెచ్‌ఓ బాలకృష్ణ నాయక్, రుయా సూపరింటెండెంట్ మనోహర్, యాదవ కార్పొరేషన్ చైర్మన్ నరసింహ యాదవ్ బిజెపి జిల్లా అధ్యక్షులు సామంచి శ్రీనివాస్, హెచ్ డి ఎస్ సభ్యులు బండ్ల లక్ష్మీపతి, మునస్వామి, సందీప్, ఖాజా మొహిద్దిన్ పాల్గొన్నారు.

సీఎం గౌడ్ తిరుపతి స్టాప్ రిపోర్టర్