రోడ్డెక్కిన వీఆర్ఏలు.. సమస్యలు పరిష్కరించాలని డిమాండ్

అనపర్తి మేజర్ న్యూస్ : తమ సమస్యలను పరిష్కరించాలని కోరుతూ 11 రోజులుగా శాంతియుతంగా నిరసనలు కొనసాగిస్తున్న వీఆర్ఏలు శనివారం రోడ్డెక్కారు. తూర్పు గోదావరి జిల్లా  అనపర్తి, బిక్కవోలు, రంగంపేట మండలాలకు చెందిన వీఆర్ఏలు పెద్ద సంఖ్యలో అనపర్తి దేవి చౌక్‌ సెంటర్‌కు చేరుకుని మెయిన్‌రోడ్డుపై మానవహారం నిర్వహించారు. తమ న్యాయమైన డిమాండ్లను ప్రభుత్వం వెంటనే పరిష్కరించాలని నినాదాలు చేస్తూ నిరసన తెలిపారు.

అనంతరం దేవి చౌక్‌ నుంచి పట్టణంలోని ప్రధాన వీధుల మీదుగా ర్యాలీ చేపట్టారు. నినాదాలు చేస్తూ ర్యాలీగా ముందుకు సాగిన వీఆర్ఏలు తమ సమస్యలను ప్రభుత్వం దృష్టికి తీసుకెళ్లాలని కోరారు.

ఈ సందర్భంగా వీఆర్ఏల సంఘం ప్రతినిధులు మాట్లాడుతూ తాము ప్రభుత్వానికి వ్యతిరేకంగా ఆందోళన చేయడం లేదని, తమ న్యాయమైన డిమాండ్ల పరిష్కారం కోసమే శాంతియుతంగా నిరసన కార్యక్రమాలు చేపడుతున్నామని తెలిపారు. రాష్ట్ర సంఘం పిలుపు మేరకు ఈ కార్యక్రమాలను నిర్వహిస్తున్నట్లు పేర్కొన్నారు.

గ్రామీణ ప్రాంతాల్లో ప్రభుత్వానికి, ప్రజలకు మధ్య వారధిగా వీఆర్ఏలు ఎన్నో సంవత్సరాలుగా సేవలందిస్తున్నారని చెప్పారు. గ్రామస్థాయిలో రెవెన్యూ శాఖకు సంబంధించిన వివిధ కార్యక్రమాల అమలులో కీలక పాత్ర పోషిస్తున్న తమ సమస్యలను ప్రభుత్వం గుర్తించి పరిష్కరించాలని విజ్ఞప్తి చేశారు.

గత 11 రోజులుగా శాంతియుతంగా నిరసనలు నిర్వహిస్తున్నప్పటికీ తమ సమస్యలపై ప్రభుత్వం నుంచి స్పష్టమైన స్పందన రాకపోవడంతోనే మానవహారం, ర్యాలీ నిర్వహించాల్సి వచ్చిందని వీఆర్ఏలు తెలిపారు. తమ న్యాయమైన డిమాండ్లను ప్రభుత్వం సానుకూలంగా పరిశీలించి వెంటనే అమలు చేయాలని కోరారు.

సమస్యలు పరిష్కరించే వరకు ఆందోళన కార్యక్రమాలను కొనసాగిస్తామని వీఆర్ఏల సంఘం ప్రతినిధులు స్పష్టం చేశారు.