రైతుబిడ్డ నుంచి భారత పారా త్రోబాల్ జట్టు కోచ్‌గా
భీమవరం సూర్య న్యూస్: సాధారణ రైతు కుటుంబంలో పుట్టి, క్రీడారంగంలో అంచెలంచెలుగా ఎదిగిన కలిదిండి శివరామకృష్ణరాజు భారత పురుషుల పారా త్రోబాల్ జట్టుకు ప్రధాన కోచ్‌గా ఎంపికై స్ఫూర్తిగా నిలిచారు. పాలకొల్లు మండలం దగ్గులూరుకు చెందిన ఆయన వాలీబాల్ క్రీడాకారుడిగా ప్రస్థానం ప్రారంభించి ఆంధ్రప్రదేశ్‌కు ప్రాతినిధ్యం వహించారు.క్రీడా కోటాలో ముంబై జోన్ ఆదాయపు పన్ను శాఖలో ఇన్‌స్పెక్టర్‌గా ఉద్యోగం పొందిన ఆయన, అనంతరం సర్దార్ వల్లభ్‌భాయ్ పటేల్ జాతీయ పోలీసు అకాడమీలో క్రీడలు, శారీరక శిక్షణ విభాగంలో సేవలందించారు. 500 మందికి పైగా ఐపీఎస్ అధికారులకు శిక్షణ అందించిన అనుభవం ఆయనకు ఉంది.పారా క్రీడలపై ఆసక్తితో పనిచేస్తున్న ఆయన ప్రతిభ, అనుభవాన్ని గుర్తించిన ప్రభుత్వం జాతీయ పారా త్రోబాల్ జట్టు ప్రధాన కోచ్‌గా బాధ్యతలు అప్పగించింది. నవంబర్ 19 నుంచి 23 వరకు శ్రీలంకలో జరిగే రెండో దక్షిణాసియా పారా త్రోబాల్ ఛాంపియన్‌షిప్‌లో భారత జట్టుకు ఆయన కోచ్‌గా వ్యవహరించనున్నారు.శ్రమిస్తే విజయం తథ్యంయువత లక్ష్యాన్ని నిర్దేశించుకుని నిరంతరం శ్రమించాలని శివరామకృష్ణరాజు సూచించారు. క్రీడల్లో రాణిస్తే ఉన్నత ఉద్యోగాలతో పాటు దేశానికి సేవ చేసే అవకాశాలు లభిస్తాయని తెలిపారు. తనపై ప్రభుత్వం ఉంచిన బాధ్యతను సమర్థంగా నిర్వర్తించి భారతదేశానికి మంచి పేరు తీసుకురావడమే లక్ష్యమని పేర్కొన్నారు.
రిపోర్టర్ శ్రీనివాస్ భీమవరం పశ్చిమగోదావరి జిల్లా
