ప్రజా దర్బార్‌తో సమస్యల పరిష్కారానికి భరోసా * కంకిపాడు లాక్‌ రోడ్డులో మద్యం దుకాణం ఏర్పాటుపై మహిళల అభ్యంతరం * ఎక్సైజ్‌ మంత్రి కొల్లు రవీంద్రతో మాట్లాడిన ఎమ్మెల్యే బోడే ప్రసాద్
పెనమలూరు, మేజర్ న్యూస్ : ప్రజల సమస్యల పరిష్కారమే లక్ష్యంగా ప్రతి శుక్రవారం పెనమలూరు నియోజకవర్గ తెలుగుదేశం పార్టీ కార్యాలయంలో నిర్వహించే ప్రజా దర్బార్‌లో ఎమ్మెల్యే బోడే ప్రసాద్ పాల్గొని, వివిధ ప్రాంతాల నుంచి వచ్చిన ప్రజల సమస్యలను స్వయంగా విని వినతిపత్రాలను స్వీకరించారు. పెన్షన్లు, ప్రభుత్వ పథకాలు, ముఖ్యమంత్రి సహాయ నిధి, రహదారులు, మురుగునీటి కాలువలు తదితర సమస్యలపై వచ్చిన ఫిర్యాదులను పరిశీలించి, సంబంధిత అధికారులతో మాట్లాడి పరిష్కారానికి చర్యలు తీసుకున్నారు. కంకిపాడు లాక్‌ రోడ్డులో నూతనంగా ఏర్పాటు చేయనున్న మద్యం దుకాణాన్ని నిలిపివేయాలని పలువురు మహిళలు ఎమ్మెల్యేకు వినతిపత్రం అందజేశారు. దీనిపై సానుకూలంగా స్పందించిన బోడే ప్రసాద్, ఎక్సైజ్‌ శాఖ మంత్రి కొల్లు రవీంద్రతో వీడియో కాల్‌లో మాట్లాడి మహిళలతో సమస్యను వివరింపజేశారు. మద్యం దుకాణం ఏర్పాటుతో ఎదురయ్యే అనర్థాలను మహిళలు వివరించగా, దీనిపై వెంటనే చర్యలు తీసుకుంటామని మంత్రి హామీ ఇచ్చారు. అదేవిధంగా పలు కళాశాలల వద్ద ఆకతాయిల ఆగడాలు పెరుగుతున్నాయన్న ఫిర్యాదులపై స్పందించిన ఎమ్మెల్యే, గుర్తించిన యువకులకు కౌన్సెలింగ్‌ ఇప్పించారు. నియోజకవర్గంలోని పలు గ్రామాల్లో డ్రైనేజీ సమస్యలను సంబంధిత అధికారుల దృష్టికి తీసుకెళ్లి త్వరితగతిన పరిష్కరించాలని ఆదేశించారు. ప్రజలు తమ సమస్యలను నేరుగా తెలియజేసేందుకు పార్టీ కార్యాలయం ప్రతిరోజూ అందుబాటులో ఉంటుందని, ప్రతి సమస్యను బాధ్యతగా తీసుకుని పరిష్కారానికి కృషి చేస్తామని ఎమ్మెల్యే బోడే ప్రసాద్ భరోసా ఇచ్చారు.
✍️ప్రేమ్ రాజ్, పెనమలూరు, కృష్ణా జిల్లా
