పురుగుమందు కలిసిన గడ్డి తిని 35 గొర్రెలు, మేకలు మృతి.. కన్నీరుమున్నీరవుతున్న కాపరి కుటుంబం!

హిరమండలం సెప్టెంబర్ 28 మేజర్ న్యూస్

​హిరమండలం మండలం మర్రిగూడ పంచాయతీ పరిధిలోని భీమవరం కొండ సమీపంలో పురుగుమందుల అవశేషాలు ఉన్న గడ్డిని మేయడంతో దాదాపు 35 గొర్రెలు, మేకలు అకస్మాత్తుగా మృత్యువాత పడ్డాయి. పాతపట్నం మండలం కొరసవాడ గ్రామానికి చెందిన గొర్రెల కాపరి బతకల లక్ష్మీనారాయణ దాదాపు రెండు నెలల క్రితం తన జీవాలను మేత కోసం ఈ ప్రాంతానికి తీసుకురాగా, పచ్చగడ్డి మేస్తున్న క్రమంలో అవి ఒక్కసారిగా అస్వస్థతకు గురై కళ్లముందే కుప్పకూలిపోయాయి. మృతి చెందిన వాటిలో గర్భంతో ఉన్న జీవాలు కూడా ఉన్నాయని, పిల్లల చదువులు, కుటుంబ పోషణకు ఏకైక ఆధారమైన మూగజీవాలను ఒకే రోజులో కోల్పోవడంతో తీవ్ర ఆర్థిక నష్టం వాటిల్లిందని లక్ష్మీనారాయణ దంపతులు కన్నీటిపర్యంతమయ్యారు. ఈ దారుణ ఘటనపై పశువైద్య అధికారులు తక్షణమే స్పందించి విచారణ జరిపి, జీవనాధారాన్ని కోల్పోయిన తమ పేద కుటుంబాన్ని ప్రభుత్వం తగిన నష్టపరిహారం అందించి ఆదుకోవాలని బాధితులు వేడుకుంటున్నారు.