పోషకాహారం, బాల్య ప్రేరణపై అవగాహన

వెల్దుర్తి, సూర్య ప్రతినిధి మేజర్ న్యూస్  తల్లి, బిడ్డలు ఆరోగ్యంగా ఉన్నప్పుడే సమాజాభివృద్ధి సాధ్యమవుతుందని అంగన్వాడీ కార్యకర్తలు పేర్కొన్నారు. వెల్దుర్తి ప్రాజెక్ట్, రామళ్లకోట సెక్టార్‌ పరిధిలోని S.బోయినపల్లి, నరసాపురం, పిక్కినవానిపల్లి, లింగాలపల్లి గ్రామాల్లోని అంగన్వాడీ కేంద్రాల్లో చిన్నారుల సమగ్ర అభివృద్ధి లక్ష్యంగా ‘అంగన్వాడీ ఉత్సవాలు’ ఘనంగా నిర్వహించారు.

9వ జాతీయ పోషణ మాసోత్సవంలో భాగంగా ‘సేవా సంకల్ప్ అభియాన్’ కింద గర్భిణులు, బాలింతలు, మూడేళ్ల లోపు పిల్లలతో పాటు 3 నుంచి 6 ఏళ్ల చిన్నారులకు అంగన్వాడీ కేంద్రాల ద్వారా అందిస్తున్న సేవలపై గ్రామీణులకు స్పష్టమైన అవగాహన కల్పించారు. బాల్య ప్రేరణ (ఎర్లీ చైల్డ్‌హుడ్ కేర్), పోషకాహార ప్రాధాన్యత గురించి వివరించారు.

తల్లి, బిడ్డలు ఆరోగ్యంగా ఉండేందుకు చిరుధాన్యాలు, ఆకుకూరలు, పండ్లు, అంగన్వాడీ కేంద్రాల ద్వారా ఇచ్చే బలవర్ధక ఆహారాన్ని ప్రతిరోజూ తప్పనిసరిగా తీసుకోవాలని సూచించారు. ఈ కార్యక్రమంలో అంగన్వాడీ టీచర్లు లలితమ్మ, జ్యోతి, మహేశ్వరి, వెంకటేశ్వరిలతో పాటు గ్రామాల్లోని తల్లులు, గర్భిణులు, చిన్నారులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.

సూర్యా ప్రతినిధి షేక్ దస్తగిరి కర్నూలు జిల్లా వెల్దుర్తి మండలం