పంచాయతీ ఎన్నికలు ప్రశాంతంగా జరగాలి.

బొడ్డపాడులో పోలీసుల అవగాహన కార్యక్రమం - గొడవలకు పాల్పడితే కఠిన చర్యలు.

కాశీబుగ్గ ఎస్ హెచ్ఓ ఎం అప్పారావు.

పలాస, నవంబర్ 14,మేజర్ న్యూస్.

పలాస మండలంలో రాబోయే పంచాయతీ ఎన్నికలు ప్రశాంత వాతావరణంలో, ఎలాంటి అవాంఛనీయ సంఘటనలకు తావులేకుండా నిర్వహించేందుకు పోలీసు శాఖ ప్రత్యేక చర్యలు చేపడుతోంది.ఈ కార్యక్రమంలో భాగంగా శనివారం కాశీబుగ్గ పోలీస్ స్టేషన్ ఎస్‌హెచ్‌ఓ ఎం అప్పారావు బొడ్డపాడు గ్రామ పంచాయతీని సందర్శించారు. గ్రామంలోని ఇరు రాజకీయ పార్టీల ముఖ్య నాయకులు, పెద్దలు, ప్రజలతో సమావేశమై ఎన్నికల నిర్వహణపై చర్చించారు.

ఎస్‌హెచ్‌ఓ సూచనలు.

ఎన్నికల సమయంలో గ్రామంలో గొడవలు, ఘర్షణలు, వివాదాలు చోటుచేసుకోకుండా ప్రతి ఒక్కరూ బాధ్యతగా వ్యవహరించాలి.నాయకులు, కార్యకర్తలు పరస్పర గౌరవంతో మెలగాలి, కక్ష సాధింపు ధోరణి ప్రదర్శించకూడదు.ఓటర్లను ప్రలోభాలకు గురిచేయడం, బెదిరింపులకు పాల్పడటం, శాంతిభద్రతలకు విఘాతం కలిగించే చర్యలకు దూరంగా ఉండాలి.ఎన్నికల నిబంధనలను ప్రతి ఒక్కరూ తప్పనిసరిగా పాటించాలి.శాంతిభద్రతలకు భంగం కలిగించే ప్రయత్నాలు చేసినా, గొడవలు సృష్టించినా, చట్టవిరుద్ధ కార్యకలాపాలకు పాల్పడినా చట్టప్రకారం కఠిన చర్యలు తీసుకుంటామని ఎస్‌హెచ్‌ఓ స్పష్టం చేశారు.గ్రామ పెద్దలు, యువత, ప్రజాప్రతినిధులు ఎన్నికలు ప్రశాంతంగా జరిగేలా పోలీసులకు సహకరించాలని కోరారు. ఏవైనా సమస్యలు తలెత్తితే చట్టపరమైన మార్గాల్లోనే పరిష్కరించుకోవాలని సూచించారు.ఈ సమావేశంలో ఇరు పార్టీల నాయకులు, గ్రామ పెద్దలు, స్థానిక ప్రజలు పాల్గొన్నారు.