పేదలకు కొండంత అండగా కూటమి ప్రభుత్వం

పర్చూరు: పేద, మధ్యతరగతి కుటుంబాల అత్యవసర వైద్య ఖర్చుల్లో అండగా నిలుస్తూ కూటమి ప్రభుత్వం పెద్దకొడుకు పాత్ర పోషిస్తోందని ఎమ్మెల్యే ఏలూరి సాంబశివరావు అన్నారు. గత రెండేళ్లలో పర్చూరు నియోజకవర్గానికి ముఖ్యమంత్రి సహాయనిధి (సీఎంఆర్‌ఎఫ్‌) ద్వారా రూ.22.20 కోట్లకు పైగా సాయం అందించినట్లు తెలిపారు. పర్చూరు ఎమ్మెల్యే క్యాంపు కార్యాలయంలో గురువారం నిర్వహించిన సీఎంఆర్‌ఎఫ్‌ చెక్కుల పంపిణీ కార్యక్రమంలో ఆయన మాట్లాడారు.

అనారోగ్యంతో ఆసుపత్రుల్లో చికిత్స పొందుతూ భారీగా వైద్య ఖర్చులు చేసిన పేద, మధ్యతరగతి కుటుంబాలకు సీఎంఆర్‌ఎఫ్‌ ఎంతో భరోసా కల్పిస్తోందన్నారు. ముఖ్యమంత్రి నారా చంద్రబాబునాయుడు పేద కుటుంబాలను పెద్దకొడుకులా ఆదుకుంటున్నారని పేర్కొన్నారు.

గురువారం నిర్వహించిన కార్యక్రమంలో 135 మంది లబ్ధిదారులకు రూ.67.28 లక్షల విలువైన సీఎంఆర్‌ఎఫ్‌ చెక్కులను పంపిణీ చేసినట్లు ఏలూరి తెలిపారు. నియోజకవర్గంలోని ప్రజలకు అవసరమైన సమయంలో ప్రభుత్వం అండగా నిలుస్తోందన్నారు.

మంత్రులకు ఘన స్వాగతం: పర్చూరు నియోజకవర్గ అభివృద్ధి కార్యక్రమాల్లో పాల్గొనేందుకు క్యాంపు కార్యాలయానికి వచ్చిన రాష్ట్ర రోడ్లు, భవనాల శాఖ మంత్రి బీసీ జనార్దన్‌రెడ్డి, హోం, విపత్తు నిర్వహణ శాఖ మంత్రి వంగలపూడి అనితకు ఎమ్మెల్యే ఏలూరి స్వాగతం పలికారు. నియోజకవర్గ అభివృద్ధికి సహకరిస్తున్న ముఖ్యమంత్రి చంద్రబాబునాయుడు, మంత్రి నారా లోకేశ్‌తో పాటు మంత్రులకు ప్రజల తరఫున కృతజ్ఞతలు తెలిపారు.

ప్రభుత్వ సంక్షేమ, అభివృద్ధి కార్యక్రమాలకు ప్రజలు, పార్టీ శ్రేణులు అండగా నిలవాలని కోరారు. మంత్రులకు ప్రజలు ఘనంగా ఆశీర్వాదాలు అందించాలని ఎమ్మెల్యే ఏలూరి సాంబశివరావు విజ్ఞప్తి చేశారు.