పేదల ముఖాల్లో చిరునవ్వులే లక్ష్యం: 26వ వార్డులో పింఛన్ల పంపిణీ చేపట్టిన చింతకాయల పద్మావతి

- ​తెల్లవారుజాము నుంచే లబ్ధిదారుల ఇళ్లకు వెళ్లి స్వయంగా నగదు  అందించిన స్పీకర్ సతీమణి పద్మావతి.

​నర్సీపట్నం అక్టోబర్ 1 మేజర్ న్యూస్ :
నర్సీపట్నం పట్టణాభివృద్ధితో పాటు అర్హులైన ప్రతి ఒక్కరికీ సంక్షేమ ఫలాలు అందించడమే తమ ప్రధాన ధ్యేయమని 26వ వార్డు తెదేపా ఇన్‌ఛార్జ్, శాసనసభ స్పీకర్ చింతకాయల అయ్యన్నపాత్రుడు సతీమణి చింతకాయల పద్మావతి తెలిపారు. గురువారం నర్సీపట్నం మున్సిపాలిటీ పరిధిలోని 26వ వార్డులో నిర్వహించిన పింఛన్ల పంపిణీ కార్యక్రమంలో ఆమె విస్తృతంగా పర్యటించారు. తెల్లవారుజామున 6 గంటల నుంచే వార్డులోని ప్రతి ఇంటికి స్వయంగా వెళ్లి వృద్ధులు, దివ్యాంగులకు పింఛన్ సొమ్మును పంపిణీ చేశారు.
​ఈ సందర్భంగా లబ్ధిదారులతో ఆప్యాయంగా మాట్లాడిన పద్మావతి, వారి యోగక్షేమాలతో పాటు స్థానికంగా ఏవైనా సమస్యలు ఉన్నాయా అని అడిగి తెలుసుకున్నారు. అనంతరం ఆమె మాట్లాడుతూ, స్పీకర్ అయ్యన్నపాత్రుడు ప్రత్యేక సహకారంతో నర్సీపట్నం పట్టణాన్ని అన్ని రంగాల్లో వేగంగా అభివృద్ధి బాటలో పయనింపజేస్తున్నామని పేర్కొన్నారు. సంక్షేమ పథకాలు ప్రతి పేదవాడి ఇంటికీ సకాలంలో అందేలా చర్యలు తీసుకుంటున్నామని స్పష్టం చేశారు. ఈ కార్యక్రమంలో మున్సిపల్ కమిషనర్ జె. సురేంద్ర, నూకాంబిక ఆలయ కమిటీ ఛైర్మన్ శ్రీను, పలువురు యువత, మహిళా నేతలు మరియు పార్టీ కార్యకర్తలు పెద్ద సంఖ్యలో పాల్గొన్నారు.