పరిధి దాటితే యాక్షన్ తప్పదు.. రెబల్స్‌కు నో ఛాన్స్: పవన్ కళ్యాణ్
సూర్య స్టేట్ బ్యూరో, అమరావతి: కూటమి ధర్మాన్ని ఉల్లంఘించి ఎవరైనా హద్దులు దాటి ప్రవర్తిస్తే జనసేన పార్టీ తరఫున ఉపేక్షించేది లేదని, కఠిన చర్యలు తప్పవని ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కళ్యాణ్ స్పష్టం చేశారు. టీడీపీ, జనసేన, బీజేపీ కూటమి ఐక్యతే రాష్ట్ర భవిష్యత్తుకు బలమైన పునాది అని పేర్కొన్న ఆయన, క్షేత్రస్థాయిలో పార్టీ శ్రేణులు క్రమశిక్షణతో మెలగాలని గట్టిగా హెచ్చరించారు.
సంస్థాగతంగా ఇంత పెద్ద కసరత్తు ఎప్పుడూ జరగలేదు:
ఎన్నికల నాటి నుంచి నేటి వరకు కూటమి ఐక్యత కోసం అసాధారణమైన కసరత్తు సాగిందని పవన్ కళ్యాణ్ గుర్తుచేశారు. "తెలుగుదేశం పార్టీ ఆవిర్భవించిన నాటి నుంచి సంస్థాగతంగా ఇంత పెద్ద ఎత్తున ఎక్సర్‌సైజ్ (కసరత్తు) ఎన్నడూ చేయలేదు. సీట్ల సర్దుబాటు మొదలుకొని క్షేత్రస్థాయి సమన్వయం వరకు కార్యకర్తల నుంచి వచ్చిన తీవ్రమైన ఒత్తిడిని సీఎం చంద్రబాబు నాయుడు, నారా లోకేష్ మరియు నేను స్వయంగా స్వీకరించి సమతుల్యం చేశాం. కూటమిలో రెబల్స్‌కు ఎలాంటి ఆస్కారం లేదు (No Chance for Rebels)" అని ఆయన తేల్చిచెప్పారు.
చంద్రబాబు అనుభవాన్ని గౌరవిస్తూ పవన్ వ్యాఖ్యలు:
రాజకీయాల్లో సుదీర్ఘ అనుభవం కలిగిన ముఖ్యమంత్రి నారా చంద్రబాబు నాయుడు వ్యవహరించిన తీరును పవన్ కళ్యాణ్ ప్రత్యేకంగా కొనియాడారు. "దశాబ్దాల సుదీర్ఘ రాజకీయ ప్రస్థానం కలిగిన చంద్రబాబు నాయుడు గారు మమ్మల్ని ఎక్కడా కించపరచలేదు, తూలనాడలేదు. పూర్తి గౌరవప్రదమైన రీతిలోనే చర్చలు, నిర్ణయాలు సాగాయి" అని ఆయన వివరించారు. పెద్ద మనసుతో, పరస్పర అవగాహనతో ముందుకెళ్తున్న తరుణంలో కింది స్థాయిలో నాయకులు, శ్రేణులు అనవసర ప్రకటనలతో కూటమికి భంగం కలిగిస్తే సహించే ప్రసక్తే లేదని స్పష్టం చేశారు.
