పలువురికి జక్కంపూడి రాజా పరామర్శ

కోరుకొండ, మేజర్ న్యూస్ :తూర్పు గోదావరి జిల్లా కోరుకొండ మండలంలో ఇటీవల మృతి చెందిన పలువురి కుటుంబ సభ్యులను, అనారోగ్యంతో బాధపడుతున్న వారిని వైఎస్ఆర్ కాంగ్రెస్ పార్టీ యువజన విభాగం రాష్ట్ర అధ్యక్షుడు, మాజీ ఎమ్మెల్యే జక్కంపూడి రాజా శనివారం పరామర్శించారు. బాధిత కుటుంబాల పరిస్థితులను అడిగి తెలుసుకుని వారికి తన సానుభూతి, భరోసా తెలిపారు.

నిడిగట్ల గ్రామంలో ఇటీవల మృతి చెందిన గుడారపు అరవాలు, వల్లభశెట్టి రమణమ్మ కుటుంబ సభ్యులను జక్కంపూడి రాజా పరామర్శించి సానుభూతి వ్యక్తం చేశారు. బూరుగుపూడిలో గుండె సంబంధిత సమస్యతో బాధపడుతున్న నడిపెల్లి శ్రీనివాసును పరామర్శించి ఆరోగ్య పరిస్థితిని అడిగి తెలుసుకున్నారు. అదే గ్రామంలో అనారోగ్యంతో మృతి చెందిన గడ్డం రాజు కుటుంబ సభ్యులను కలిసి సంతాపం తెలిపారు.

ఇటీవల జరిగిన అగ్ని ప్రమాదంలో ఇల్లు పూర్తిగా దగ్ధమై నిరాశ్రయులైన మంగం శివ, అమ్ములు కుటుంబాలను కూడా ఆయన పరామర్శించారు. ఈ సందర్భంగా బాధిత కుటుంబాలకు అండగా ఉంటామని, అవసరమైన సహాయం అందించేందుకు కృషి చేస్తామని భరోసా ఇచ్చారు.

పశ్చిమ గోనగూడెం గ్రామంలో వినాయక చవితి సందర్భంగా చెరువులో పూల సేకరణకు వెళ్లి మృతి చెందిన సోడదాసి వీరబాబు, గోనుపాటి శివ కుటుంబ సభ్యులను జక్కంపూడి రాజా పరామర్శించారు. వారికి తన ప్రగాఢ సానుభూతి, సంతాపాన్ని తెలియజేశారు. అనంతరం కిడ్నీ సంబంధిత వ్యాధితో బాధపడుతున్న తాటికొండ వీర వెంకట దుర్గా ప్రసాద్ (పండు)ను పరామర్శించి ఆరోగ్య పరిస్థితిపై వివరాలు తెలుసుకున్నారు.

ఈ పర్యటనలో స్థానిక వైఎస్ఆర్ కాంగ్రెస్ పార్టీ నాయకులు, కార్యకర్తలు జక్కంపూడి రాజా వెంట ఉన్నారు.