ఓటమి చెందిన వైసీపీ అభ్యర్థులకు మాజీ ఎమ్మెల్యే పరామర్శ.
రంగంపేట మేజర్ న్యూస్. ఇటీవల జరిగిన స్థానిక సంస్థల ఎన్నికల్లో అనపర్తి నియోజకవర్గం, రంగంపేట మండలంలో వైఎస్సార్ కాంగ్రెస్ పార్టీ తరఫున పోటీ చేసి ఓటమి చెందిన జడ్పిటిసి అభ్యర్థి, ఎంపీటీసీ అభ్యర్థులను బుధవారం అనపర్తి మాజీ ఎమ్మెల్యే, వైసీపీ నియోజకవర్గ సమన్వయకర్త డాక్టర్ సత్తి సూర్యనారాయణరెడ్డి పరామర్శించారు. వారి కుటుంబ సభ్యులను కలిసి ధైర్యం చెప్పారు.ఈ సందర్భంగా ఆయన మాట్లాడుతూ ఎన్నికల ఫలితాలతో సంబంధం లేకుండా ప్రజల్లో ఉంటూ సేవ చేయడమే రాజకీయ నాయకుడి బాధ్యతని అన్నారు. ఓటమికి అధైర్యపడకుండా భవిష్యత్తు కార్యాచరణపై దృష్టి సారించాలని సూచించారు. పార్టీ నాయకులు, కార్యకర్తలకు ఎలాంటి కష్టం వచ్చినా అండగా ఉంటానని భరోసా ఇచ్చారు. ప్రజా సమస్యల పరిష్కారం కోసం నిరంతరం పోరాటం కొనసాగించాలని పిలుపునిచ్చారు. ఈ కార్యక్రమంలో వైఎస్ఆర్సిపి రంగంపేట ఇంచార్జ్ నల్లమిల్లి మురళీమోహన్ బాలకృష్ణారెడ్డి, ఇతర వైసిపి నాయకులు కార్యకర్తలు పాల్గొన్నారు.
