ఓపెన్‌ స్కూల్‌లో పదో తరగతి ప్రవేశాలు

నక్కపల్లి,మేజర్ న్యూస్; నవంబరు 12: వివిధ కారణాలతో మధ్యలో చదువు మానేసిన వారికి ఓపెన్‌ స్కూల్‌ ద్వారా పదో తరగతి చదివే అవకాశం కల్పిస్తున్నట్లు ఎంఈవో-1 కే.నరేష్‌, ఎంఈవో-2 ఆర్‌.నాగన్నదొర తెలిపారు. గురువారం వెలుగు కార్యాలయంలో తల్లిదండ్రులకు అవగాహన కల్పించారు. 2026-27 విద్యా సంవత్సరానికి వేంపాడు ఉన్నత పాఠశాలలో ప్రవేశాలు ప్రారంభమైనట్లు పేర్కొన్నారు. 14 ఏళ్లు నిండిన వారు, పదో తరగతి తప్పిన వారు అర్హులన్నారు. సెలవు రోజుల్లో తరగతులు నిర్వహిస్తామని, మహిళలు, ఎస్సీ, బీసీ, మైనార్టీ, దివ్యాంగులకు ఫీజు రాయితీ ఉంటుందని తెలిపారు. ఉద్యోగాలు, ఉన్నత విద్యకు ఓపెన్‌ స్కూల్‌ సర్టిఫికెట్‌ రెగ్యులర్‌ పదో తరగతితో సమానమైన గుర్తింపు కలిగి ఉంటుందన్నారు. ఆసక్తి ఉన్నవారు 9963218079 నంబరులో వేంపాడు పాఠశాల హెచ్‌ఎం యు.వరలక్ష్మిని సంప్రదించాలని సూచించారు. కార్యక్రమంలో వెలుగు ఏపీఎం పి.శ్రీనివాసరావు పాల్గొన్నారు.