ఒంగోలు ఆవుకు పుంగనూరు దూడ జననం

నేటి దినపత్రిక సూర్య బ్యూరో రాజమహేంద్రవరం 

మండల పరిధిలోని ఏడిద సావరం రోడ్డులో ఓ అరుదైన దూడ అందరి దృష్టిని ఆకర్షిస్తోంది. స్థానికంగా నివసిస్తున్న మల్లిపూడి శ్రీనుకు చెందిన ఒంగోలు ఆవుకు ఇటీవల పుంగనూరు జాతి లక్షణాలతో కూడిన పెయ్యి దూడ జన్మించింది.

కేవలం 17 అంగుళాల ఎత్తు, రెండు అడుగుల పొడవుతో ఉన్న ఈ చిట్టి దూడ ఎంతో ముద్దుగా కనిపిస్తూ చూపరులను ఆకట్టుకుంటోంది. చిన్నపాటి శరీరాకృతితో ప్రత్యేక ఆకర్షణగా నిలుస్తోంది.దసరా పండుగ సందర్భంగా తమ ఇంట్లో పెంచుకుంటున్న ఆవుకు ఇలా పెయ్యి దూడ జన్మించడం ఎంతో అదృష్టంగా భావిస్తున్నట్లు యజమాని మల్లిపూడి శ్రీను తెలిపారు. పండుగ వేళ ఇంటికి మహాలక్ష్మి వచ్చినట్లుగా భావిస్తూ కుటుంబ సభ్యులు ఆనందం వ్యక్తం చేస్తున్నారు. ఈ చిట్టి దూడను చూసేందుకు స్థానికులు ఆసక్తి చూపుతున్నారు. మొత్తానికి దసరా పండుగ వేళ జన్మించిన ఈ బుజ్జి దూడ ఏడిద ప్రాంతంలో ప్రత్యేక ఆకర్షణగా నిలుస్తోంది.