ఢిల్లీలో కాక్రోచ్ మూవ్‌మెంట్ వ్యవస్థాపకుడు అభిజీత్ దీప్కేను అదుపులోకి తీసుకున్న పోలీసులు
సూర్య జాతీయ డెస్క్: దేశ రాజధాని న్యూఢిల్లీలో నిరసన ప్రదర్శనలకు పిలుపునిచ్చిన కాక్రోచ్ జంతా పార్టీ మరియు కాక్రోచ్ మూవ్‌మెంట్ వ్యవస్థాపకుడు అభిజీత్ దీప్కేను ఢిల్లీ పోలీసులు అదుపులోకి తీసుకున్నారు. కేంద్ర ప్రభుత్వ విభాగాలు మరియు ఎన్నికల కమిషన్ తీరుకు నిరసనగా జంతర్ మంతర్ వద్ద భారీ ర్యాలీ నిర్వహించేందుకు ప్రయత్నిస్తున్న తరుణంలో విమానాశ్రయం మరియు నిరసన ప్రాంగణ పరిసర ప్రాంతాల్లో ఈ ముందస్తు నిర్బంధ చర్యలు చోటుచేసుకున్నాయి. ఈ ముందస్తు అరెస్టుకు సంబంధించిన దృశ్యాలు సామాజిక మాధ్యమాలలో వైరల్‌గా మారడంతో దేశవ్యాప్తంగా రాజకీయ మరియు విద్యార్థి వర్గాల్లో తీవ్ర చర్చనీయాంశంగా మారింది.
ఓటర్ల జాబితా సమగ్ర సవరణ మరియు ప్రధాన ఎన్నికల కమిషనర్ రాజీనామాను డిమాండ్ చేస్తూ యవజన సంఘాలు ఈ ర్యాలీకి పిలుపునిచ్చాయి. అయితే శాంతిభద్రతల పరిరక్షణ దృష్ట్యా ఈ ఆందోళన కార్యక్రమానికి ఎలాంటి అనుమతులు లేవని పోలీసులు స్పష్టం చేశారు. ఆందోళనకారులు సెంట్రల్ ఢిల్లీ వ్యాప్తంగా గుమిగూడకుండా ఉండేందుకు పోలీసులు విస్తృత భద్రతా ఏర్పాట్లు చేపట్టడమే కాకుండా, నగరంలోని పలు కీలక ప్రాంతాల్లో కట్టుదిట్టమైన ట్రాఫిక్ ఆంక్షలు విధించారు.
అభిజీత్ దీప్కేతో పాటు ఆందోళనలో పాల్గొనేందుకు వచ్చిన పలువురు యువజన నాయకులను, మద్దతుదారులను పోలీసులు అదుపులోకి తీసుకుని సమీప పోలీసు స్టేషన్లకు తరలించారు. ఏ విధమైన అవాంఛనీయ సంఘటనలు జరగకుండా ముందస్తు జాగ్రత్తగా ఢిల్లీ సరిహద్దుల వద్ద తనిఖీలను ముమ్మరం చేశారు. చట్టవ్యతిరేక సమావేశాలు లేదా ఆందోళనలు నిర్వహిస్తే కఠిన చర్యలు తీసుకుంటామని శాంతిభద్రతల విభాగం అధికారులు హెచ్చరించగా, ప్రజాస్వామ్యయుతంగా నిరసన తెలిపే హక్కును కాలరాస్తున్నారని నిర్బంధానికి గురైన ప్రతినిధులు మండిపడ్డారు.
