శ్రీ కోటదుర్గమ్మ తిరువీధి ఉత్సవాన్ని విజయవంతం చెయ్యండి

పాలకొండ, సూర్య :  శ్రీ కోటదుర్గ అమ్మ వారి దసరా ఉత్సవాల్లో భాగంగా ఈ నెల 20న నిర్వహించనున్న తిరువీధి కార్యక్రమాన్ని విజయవంతంగా నిర్వహించేందుకు ఆలయ అధికారులు, పోలీసు అధికారులు సమన్వయంతో చర్యలు చేపట్టారు. ఈ మేరకు ఆలయ ఈవో వి.వి. సూర్యనారాయణ ఆధ్వర్యంలో ఆయన కార్యాలయంలో శుక్రవారం డిఎస్పి ఎం.రాంబాబు, సీఐ ఏ.ప్రసాద్, ప్రధాన అర్చకులు సమావేశమై కార్యక్రమ నిర్వహణపై చర్చించారు. ఈ సందర్భంగా డిఎస్పి రాంబాబు మాట్లాడుతూ తిరువీధి కార్యక్రమాన్ని సాయంత్రం 6 గంటలకే ప్రారంభించాలని సూచించారు. అంతకుముందు నిర్వహించాల్సిన ఆయుధపూజతో పాటు అమ్మవారికి సంబంధించిన పూజా కార్యక్రమాలను త్వరగా పూర్తి చేయాలని తెలిపారు. ఉత్సవాల సందర్భంగా ఎలాంటి అవాంఛనీయ సంఘటనలు చోటుచేసుకోకుండా పటిష్ట బందోబస్తు ఏర్పాటు చేస్తామని, పోలీసు సిబ్బంది అప్రమత్తంగా ఉంటారని పేర్కొన్నారు. ప్రధాన అర్చకులు దార్లపూడి లక్ష్మీప్రసాదశర్మ మాట్లాడుతూ సాయంత్రం 5 గంటలకే ఆయుధ పూజ ప్రారంభించి అరగంటలో పూర్తి చేస్తామని, అనంతరం అమ్మవారి పూజలు నిర్వహించి తిరువీధి కార్యక్రమానికి సిద్ధం చేస్తామని తెలిపారు. ఉత్సవాలన్నీ భక్తులకు ఎలాంటి ఇబ్బందులు లేకుండా ఆనందోత్సాహాల మధ్య జరిగేలా ఏర్పాట్లు చేస్తామని చెప్పారు. ఈ సమావేశంలో ఎస్ఐలు శివప్రసాద్, నీలకంఠరావు, జూనియర్ అసిస్టెంట్ శ్రీనివాస్ శర్మ, సీసీ వీరాజారావు తదితరులు పాల్గొన్నారు.

రిపోర్టర్ : రమణ మూర్తి నాయుడు, పాలకొండ, పార్వతీపురం మన్యం.