నిఘా నీడలో జిల్లా.... శాంతియుతంగా ఎన్నికల నిర్వహణ

విజయనగరం, సూర్య : ఎన్నికలు ప్రశాంత వాతావరణంలో నిర్వహించేందుకు అన్ని చర్యలు తీసుకుంటామని    జిల్లా ఎస్పీ ఏఆర్ దామోదర్ తెలిపారు.  జిల్లాలో ప్రశాంతంగా ఎన్నికలను నిర్వహించే విధంగా పోలీస్ బందోబస్తును ఏర్పాటు చేస్తున్నామని చెప్పారు. పాత నేర‌స్తులు, గ‌తంలో గొడ‌వ‌ల‌కు పాల్ప‌డిన‌ సుమారు 20వేల మందిపై బైండోవర్ నమోదు చేశామన్నారు. వీరివ‌ద్ద‌నుంచి రూ.2ల‌క్ష‌లు నుంచి రూ.3ల‌క్ష‌లు పూచిక‌త్తు తీసుకోవ‌డం జ‌రిగింద‌న్నారు. ఎన్నిక‌ల స‌మ‌యంలో ఎవరైనా  గొడవకు దిగినా, గలాటా సృష్టించినా, వారిపై కేసులు నమోదు చేస్తామని, వారి పూచికత్తును రికవరీ చేస్తామని ఎస్పీ స్పష్టం చేశారు. ఇప్ప‌టికే ఎన్నిక‌ల కోడ్ అమ‌ల్లోకి వ‌చ్చింద‌ని, పెద్ద‌మొత్తంలో డ‌బ్బు, ఇత‌ర విలువైన సామ‌గ్రి త‌ర‌లించిన‌ప్పుడు, దానికి సంబంధించిన ప‌త్రాలు త‌ప్ప‌నిస‌రిగా చూపించాల్సి ఉంటుంద‌ని, లేదంటే సీజ్ చేస్తామ‌ని తెలిపారు. ఎన్నిక‌ల స‌మ‌యంలో త‌ప్పుడు ప్ర‌చారాలు చేసినా, త‌ప్పుడు స‌మాచారం ఇచ్చినా చ‌ర్య‌లు తీసుకుంటామ‌న్నారు. శుక్ర‌వారం నుంచి జిల్లాలో చెక్‌పోస్టులు ప్రారంభ‌మ‌వుతాయ‌న్నారు.  ప్రతి ఒక్కరూ తమ ఓటు హక్కును సజావుగా, స్వేచ్ఛగా వినియోగించే విధంగా పోలీస్ బందోబస్తును ఏర్పాటు చేస్తామన్నారు. ప్రజలంతా ప్రశాంతంగా ఎన్నికలను జరిపేందుకు తమ వంతు సహకారాన్ని అందించాలని ఈ సందర్భంగా ఎస్పీ కోరారు.

రిపోర్టర్ :  డేవిడ్ రాజు, విజయనగరం.