నెల్లూరు రూరల్‌లో వైసీపీకి మరో దెబ్బ..
నెల్లూరు రూరల్, మేజర్ న్యూస్: నెల్లూరు రూరల్ నియోజకవర్గంలో వైఎస్సార్ కాంగ్రెస్ పార్టీకి చెందిన నాయకుడు ఉడతా మురళి తెలుగుదేశం పార్టీలో చేరారు. వైసీపీ జిల్లా బీసీ సెల్ ఉపాధ్యక్షుడిగా ఉన్న ఆయన తన పదవికి, పార్టీకి రాజీనామా చేసి తన మిత్ర బృందంతో కలిసి టీడీపీలో చేరినట్లు సమాచారం. నెల్లూరు రూరల్ ఎమ్మెల్యే కార్యాలయంలో నిర్వహించిన కార్యక్రమంలో ఎమ్మెల్యే కోటంరెడ్డి శ్రీధర్ రెడ్డి, టీడీపీ రాష్ట్ర అధికార ప్రతినిధి కోటంరెడ్డి గిరిధర్ రెడ్డి సమక్షంలో ఉడతా మురళి టీడీపీ కండువా కప్పుకున్నారు. ఈ సందర్భంగా కోటంరెడ్డి సోదరులు ఆయనను, ఆయనతో వచ్చిన మిత్ర బృందాన్ని పార్టీలోకి సాదరంగా ఆహ్వానించారు. ఈ చేరికతో నెల్లూరు రూరల్ ప్రాంతంలో రాజకీయ పరిణామాలు ప్రాధాన్యత సంతరించుకున్నాయి. ఉడతా మురళితో పాటు ఆయన మిత్ర బృందం టీడీపీలో చేరడం స్థానిక రాజకీయ వర్గాల్లో చర్చనీయాంశంగా మారింది.
