నెల్లూరు కార్పొరేషన్‌లో స్వతంత్రుల సత్తా.. రెండు డివిజన్లలో విజయకేతనం!
నెల్లూరు, మేజర్ న్యూస్ : నెల్లూరు నగరపాలక సంస్థ ఎన్నికల్లో ఇద్దరు స్వతంత్ర అభ్యర్థులు విజయం సాధించి తమ సత్తా చాటారు. ప్రధాన రాజకీయ పార్టీల అభ్యర్థులకు గట్టి పోటీనిస్తూ 68వ, 48వ డివిజన్లలో స్వతంత్ర అభ్యర్థులు విజయబావుటా ఎగురవేశారు.
68వ డివిజన్‌లో శిరీష విజయం
68వ డివిజన్ నుంచి స్వతంత్ర అభ్యర్థిగా బరిలోకి దిగిన మీజూరు శిరీష క్యాండిల్ గుర్తుపై పోటీ చేసి విజయం సాధించారు. తెలుగుదేశం పార్టీ అభ్యర్థి కారుమూరి శైలజతో పాటు వైఎస్సార్ కాంగ్రెస్ పార్టీ అభ్యర్థి అరవ ప్రమీలను ఓడించి విజయాన్ని అందుకున్నారు. ప్రధాన పార్టీల అభ్యర్థులను వెనక్కి నెట్టి స్వతంత్ర అభ్యర్థిగా గెలుపొందడం విశేషంగా నిలిచింది.
48వ డివిజన్‌లో మస్తాన్ గెలుపు
అదేవిధంగా 48వ డివిజన్‌లో స్వతంత్ర అభ్యర్థి మస్తాన్ సిలిండర్ గుర్తుపై పోటీ చేసి విజయం సాధించారు. ఈ డివిజన్‌లోనూ ప్రధాన పార్టీల అభ్యర్థులకు పోటీనిస్తూ స్వతంత్ర అభ్యర్థిగా గెలుపొందారు.
నెల్లూరు కార్పొరేషన్ ఎన్నికల్లో రెండు డివిజన్లలో స్వతంత్ర అభ్యర్థులు విజయం సాధించడం రాజకీయంగా ఆసక్తికరంగా మారింది. ప్రజల మద్దతుతో ఎన్నికల బరిలో నిలిచి గెలుపొందిన శిరీష, మస్తాన్‌లకు వారి అనుచరులు, మద్దతుదారులు అభినందనలు తెలియజేశారు.
