నగరం మండలం జడ్పిటిసి స్థానం జనరల్ ఎంపీపీ స్థానం బీసీ మహిళకు కేటాయింపు

నగరం, మేజర్ న్యూస్: రాష్ట్రవ్యాప్తంగా స్థానిక సంస్థల ఎన్నికల కోసం ఎదురుచూస్తున్న ఆశావహులకు ఎన్నికల షెడ్యూల్ ప్రకటించడంతో కొందరు ఆనందం వ్యక్తం చేస్తుండగా, మరి కొందరు తమకు అవకాశం దక్కలేదంటూ నిరాశకు గురయ్యారు.
నగరం మండలం జడ్పిటిసి, ఎంపీపీ, ఎంపీటీసీ స్థానాల రిజర్వేషన్లను ప్రభుత్వం అధికారికంగా ప్రకటించింది. ఈ మేరకు సంబంధిత ప్రభుత్వ కార్యాలయాల వద్ద అధికారులు నోటిఫికేషన్ బహిర్గతం చేయడంతో మండలం ఒక్కసారిగా వేడెక్కింది. పోటీ చేసే అభ్యర్థులతో ఆయా పార్టీల నేతలు మంతనాలు ప్రారంభించారు.
స్థానిక మండలంలో జడ్పిటిసి స్థానాన్ని అన్ రిజర్వుడు (జనరల్)కు, ఎంపీపీ స్థానాన్ని బిసి(మహిళ)కు కేటాయించారు. మండలంలో 14 ఎంపీటీసీ స్థానాలు ఉండగా, అన్ రిజర్వుడు(జనరల్)4, అన్ రిజర్వుడు(మహిళ)3, ఎస్సీ (జనరల్)2, ఎస్సీ (మహిళ)1, బీసీ (జనరల్)2, బీసీ (మహిళ)2  స్థానాలు రిజర్వు కాగా, ఈ మండలంలో ఎస్టీలకు చోటు దక్కలేదు. మండలంలో ఎంపీటీసీ రిజర్వేషన్ స్థానాలు ఈ క్రింది విధంగా ఉన్నాయి: ఎస్సీ జనరల్ కు అల్లపర్రు, బోరమాదిగపల్లి, ఎస్సీ మహిళకు  కొలగానివారిపాలెం కేటాయించారు. 
బీసీ(జనరల్)కు చినమట్లపూడి, పెదమట్లపూడి కేటాయించారు. బీసీ(మహిళ)కు పూడివాడ, ఏలేటిపాలెం కేటాయించారు. అన్ రిజర్వుడు(జనరల్) అద్దంకివారిపాలెం, పెదపల్లి, మంత్రిపాలెం, ధూళిపూడి నార్త్ కేటాయించారు. అన్ రిజర్వుడు(మహిళ)కు నగరం, పెద్దవరం, ఈదుపల్లికి కేటాయించారు.