నగరపంచాయతీలో ప్రశాంత ఎన్నికల నిర్వహణకు సహకరించాలి

నెల్లిమర్ల, సూర్య :  ​నెల్లిమర్ల నగర పంచాయతీ ఎన్నికలను ప్రశాంతంగా, నిష్పక్షపాతంగా నిర్వహించేందుకు ప్రతి ఒక్కరూ సహకరించాలని విజయనగరం సబ్-డివిజనల్ పోలీస్ అధికారి లక్ష్మణమూర్తి కోరారు. నెల్లిమర్ల పోలీసు స్టేషన్‌లో  సిఐ శ్రీనివాసరావు, ఎస్ఐ గోపాలరావుతో కలిసి విలేకరుల సమావేశంలో  ఆయన మాట్లాడారు. ​అభ్యర్థులు, రాజకీయ పార్టీల నాయకులు ఎన్నికల ప్రవర్తనా నియమావళిని విధిగా పాటించాలి.
​ఓటర్లను ప్రలోభపెట్టడం, నగదు లేదా మద్యం పంపిణీ చేయడం, బెదిరింపులకు పాల్పడటం చట్టరీత్యా నేరం. ​కుల, మతాల పేరుతో విద్వేషాలు రెచ్చగొట్టడం మరియు ప్రచారానికి ప్రభుత్వ ఆస్తులను దుర్వినియోగం చేయకూడదు. ​ప్రచార సభలు, ర్యాలీలకు నిబంధనల ప్రకారం తప్పనిసరిగా అధికారుల అనుమతి తీసుకోవాలి. ​సమస్యాత్మక ప్రాంతాల్లో పటిష్టమైన పోలీసు బందోబస్తు ఏర్పాటు చేశామని, నిబంధనలు ఉల్లంఘిస్తే కఠిన చర్యలు తప్పవని హెచ్చరించారు.