జలదంకిలో జనసేనపై టీడీపీ నేతల చిన్నచూపా..?

జలదంకి, మేజర్ న్యూస్ :  స్థానిక సంస్థల ఎన్నికలు సమీపిస్తున్న వేళ జలదంకి మండలంలో కూటమి పార్టీల మధ్య అంతర్గత విభేదాలు తెరపైకి వస్తున్నాయి. ప్రధానంగా పొత్తు ధర్మానికి తూట్లు పొడుస్తూ తమ పార్టీకి తగిన ప్రాధాన్యం కల్పించడం లేదని జనసేన శ్రేణులు తీవ్ర అసంతృప్తి వ్యక్తం చేస్తున్నాయి. కొందరు టీడీపీ సీనియర్ నాయకులు జనసేన ఉనికిని ప్రశ్నిస్తూ, చిన్నచూపు చూస్తున్నారనే ఆరోపణలు క్షేత్రస్థాయిలో గుప్పుమంటున్నాయి.గత 2024 సార్వత్రిక ఎన్నికల్లో కూటమి చారిత్రాత్మక విజయం సాధించడంలో జనసేన పార్టీ పాత్ర అత్యంత కీలకమని ఆ పార్టీ నాయకులు, వీరమహిళలు స్పష్టం చేస్తున్నారు. అదే స్ఫూర్తితో రాబోయే స్థానిక సంస్థల ఎన్నికల్లోనూ తమకు సముచిత ప్రాతినిధ్యం కల్పించాలని, సీట్ల కేటాయింపులో న్యాయం చేయాలని డిమాండ్ చేస్తున్నారు. అయితే, క్షేత్రస్థాయి బలాబలాలు, గెలుపు గుర్రాల ఆధారంగానే సీట్లు కేటాయించాలనే ప్రతిపాదనను టీడీపీ నేతలు తెరపైకి తెస్తున్నట్లు తెలుస్తోంది.మరోవైపు రాష్ట్రస్థాయిలో కూటమి అగ్రనేతలు ఉమ్మడి అభ్యర్థుల జాబితా రూపకల్పనపై దృష్టి సారించిన నేపథ్యంలో, జలదంకి మండలంలో ఎంపీటీసీ, సర్పంచ్ స్థానాల పంపకం ఆసక్తికరంగా మారింది. జనసేనకు ఎన్ని స్థానాలు కేటాయిస్తారు? టీడీపీ సీనియర్ల వైఖరితో ఉత్కంఠగా మారిన ఈ పరిస్థితుల్లో రెండు పార్టీల మధ్య సఖ్యత, సమన్వయం సాధ్యమవుతుందా? లేదా అనేది ఇప్పుడు నియోజకవర్గ రాజకీయ వర్గాల్లో తీవ్ర చర్చనీయాంశంగా మారింది.