నామినేషన్ కార్యక్రమంలో పాల్గొన్న ఎమ్మెల్యే వేమిరెడ్డి ప్రశాంతి రెడ్డి
కొడవలూరు, మేజర్ న్యూస్ : గత వైసీపీ ప్రభుత్వ హయాంలో స్థానిక సంస్థల ఎన్నికల్లో తెలుగుదేశం పార్టీ అభ్యర్థులను నామినేషన్లు వేయకుండా అడ్డుకున్నారని కోవూరు శాసనసభ్యులు శ్రీమతి వేమిరెడ్డి ప్రశాంతి రెడ్డి విమర్శించారు. ప్రజాస్వామ్యంలో ప్రతి ఒక్కరికీ ఎన్నికల్లో పోటీ చేసే హక్కు ఉందని, గతంలో ప్రతిపక్ష అభ్యర్థులకు ఆ అవకాశం లేకుండా చేసినవారు ఇప్పుడు ప్రజాస్వామ్యం గురించి మాట్లాడుతున్నారని ఆరోపించారు. బుధవారం కొడవలూరు మండలంలోని ఎంపీడీవో కార్యాలయంలో జరిగిన నామినేషన్ల కార్యక్రమంలో ఎమ్మెల్యే పాల్గొన్నారు. ఈ సందర్భంగా నార్త్‌ రాజుపాళెం–1 ఎంపీటీసీ స్థానానికి పోసింరెడ్డి మధురిమ, నార్త్‌ రాజుపాళెం–2 స్థానానికి పల్లా వెంకటేశ్వర్లు నామినేషన్లు దాఖలు చేశారు.
ఎన్నికల నిబంధనలు పాటించాలి కూటమి తరఫున పోటీ చేస్తున్న అభ్యర్థులు, నాయకులు, కార్యకర్తలు ఎన్నికల నిబంధనలకు లోబడి వ్యవహరించాలని ఎమ్మెల్యే ప్రశాంతి రెడ్డి సూచించారు. ఎన్నికలు ప్రశాంతంగా, పారదర్శకంగా జరిగేలా అధికారులకు సహకరించాలని పిలుపునిచ్చారు.
అభివృద్ధి, సంక్షేమాన్ని ప్రజలకు వివరించండి కూటమి ప్రభుత్వం ఇచ్చిన హామీలను నెరవేరుస్తూ అభివృద్ధి, సంక్షేమానికి ప్రాధాన్యతనిస్తోందని ఎమ్మెల్యే తెలిపారు. అభ్యర్థులు, నాయకులు, కార్యకర్తలు సమన్వయంతో ఇంటింటికీ వెళ్లి, గత రెండున్నరేళ్లలో జరిగిన అభివృద్ధి, సంక్షేమ పథకాల అమలును ప్రజలకు వివరించాలని కోరారు. గత పాలనకు, ప్రస్తుత పాలనకు మధ్య ఉన్న తేడాను చెప్పి ప్రజల మద్దతు కోరాలని పిలుపునిచ్చారు.
