మొదటి రోజు మున్సిపల్ ఎన్నికల నామినేషన్ల స్వీకరణ ప్రక్రియ పూర్తి.. జిల్లా కలెక్టర్ ఆర్ మహేష్ కుమార్..

అమలాపురం,   మేజర్ న్యూస్ :రెండవ సాధారణ ఎన్నికలు–2026లో భాగంగా జిల్లాలోని పురపాలక సంఘాల ఎన్నికలకు సంబంధించి మొదటి రోజు నామినేషన్ల స్వీకరణ ప్రక్రియ పూర్తయిందని జిల్లా కలెక్టర్ డాక్టర్ ఆర్. మహేష్ కుమార్ తెలిపారు.
జిల్లాలోని అమలాపురం, రామచంద్రపురం, ముమ్మిడివరం పురపాలక సంఘాల పరిధిలో చైర్‌పర్సన్, వార్డు సభ్యుల పదవులకు సంబంధించి శుక్రవారం నామినేషన్ల స్వీకరణ చేపట్టినట్లు ఆయన పేర్కొన్నారు.
అమలాపురం పురపాలక సంఘం
అమలాపురం పురపాలక సంఘంలో చైర్‌పర్సన్ పదవికి మొదటి రోజు ఎలాంటి నామినేషన్ పత్రాలు స్వీకరించలేదని కలెక్టర్ తెలిపారు. మొత్తం 36 వార్డులకు గాను 12వ వార్డులో వైఎస్సార్‌సీపీ అభ్యర్థికి సంబంధించి ఒక నామినేషన్ పత్రం స్వీకరించినట్లు పేర్కొన్నారు. మిగిలిన 35 వార్డులకు సంబంధించి మొదటి రోజు నామినేషన్లు స్వీకరించలేదని వివరించారు.
రామచంద్రపురం పురపాలక సంఘం
రామచంద్రపురం పురపాలక సంఘంలో చైర్‌పర్సన్ పదవికి మొదటి రోజు ఎలాంటి నామినేషన్ పత్రాలు స్వీకరించలేదని కలెక్టర్ తెలిపారు. మొత్తం 32 వార్డులకు గాను 6వ, 20వ వార్డులకు సంబంధించి వైఎస్సార్‌సీపీ అభ్యర్థుల నామినేషన్ పత్రాలు స్వీకరించినట్లు పేర్కొన్నారు. మిగిలిన 30 వార్డులకు సంబంధించి మొదటి రోజు నామినేషన్లు స్వీకరించలేదని తెలిపారు.
ముమ్మిడివరం పురపాలక సంఘం:
ముమ్మిడివరం పురపాలక సంఘంలో చైర్‌పర్సన్ పదవికి మొదటి రోజు ఎలాంటి నామినేషన్ పత్రాలు స్వీకరించలేదని కలెక్టర్ వెల్లడించారు. మొత్తం 23 వార్డులకు సంబంధించి కూడా మొదటి రోజు ఎలాంటి నామినేషన్ పత్రాలు స్వీకరించలేదని తెలిపారు.పురపాలక సంఘాల ఎన్నికల ప్రక్రియను ఎన్నికల నిబంధనలకు అనుగుణంగా నిర్వహించేందుకు సంబంధిత అధికారులు అవసరమైన ఏర్పాట్లు చేపట్టినట్లు పేర్కొన్నారు