మహిళలు పారిశ్రామిక వేత్తలుగా రాణించాలి

శిక్షణ పొందిన మహిళలు నైపుణ్యాలను ఆచరణలో పెట్టి పారిశ్రామిక వేత్తలుగా రాణించాలని ఎస్వీ వెటర్నరీ వర్సిటీ విస్తరణ సంచాలకులు డాక్టర్ బి శోభామణి, ఐసీఏఆర్ నార్మ్ ప్రిన్సిపల్ సైంటిస్ డాక్టర్ బాలకృష్ణ పిలుపునిచ్చారు. ఎస్వీ వెటర్నరీ వర్సిటీలో సెంటర్ ఫర్ కంటిన్యూయింగ్ వెటర్నరీ ఎడ్యుకేషన్ అండ్ కమ్యూనికేషన్ ఆధ్వర్యంలో, హైదరాబాద్ ఐసీఏఆర్ నార్మ్ సహకారంతో మహిళలకు గోమయ ఆధారిత ఉత్పత్తుల తయారీపై నిర్వహించిన నైపుణ్య శిక్షణ కార్యక్రమం బుధవారం ముగిసింది. ఈ కార్యక్రమానికి వారు ముఖ్యఅతిథులుగా విచ్చేసి మాట్లాడుతూ గోమయాన్ని విలువైన మార్కెటబుల్ ఉత్పత్తులుగా మార్చడం ద్వారా స్వయం ఉపాధిని పొందడంతో పాటు విజయవంతమైన పారిశ్రామికవేత్తలుగా ఎదగాలని ఆకాంక్షించారు. ఈ శిక్షణ ద్వారా మహిళలకు గోమయ ఉత్పత్తుల తయారీ, మాన్యువల్ మౌల్ట్స్, యంత్రాల వినియోగం, విలువ జోడింపు, మార్కెటింగ్, ఎగుమతులు, యూనిట్ నిర్వహణ, ఆర్థిక వనరుల సమీకరణపై సమగ్ర అవగాహన కల్పించారు. అనంతరం శిక్షణ పొందిన మహిళలకు సర్టిఫికేట్లను అందజేశారు. ఈ కార్యక్రమంలో ప్రోగ్రామ్ కోఆర్డినేటర్ డాక్టర్ సుజాత, కోఆర్డినేటర్లు డాక్టర్ శ్వేత కాంతి, డాక్టర్ మంజరి, డాక్టర్ రెడ్డి వరప్రసాద్, ట్రైనర్లు, పెద్ద సంఖ్యలో మహిళలు పాల్గొన్నారు