మహిళలు చట్టపరమైన హక్కులపై అవగాహన పెంచుకోవాలి హక్కులతో పాటు బాధ్యతలనూ గుర్తెరగాలి తణుకు కోర్టు ప్రాంగణంలో న్యాయవిజ్ఞాన సదస్సు

తణుకు, సూర్య న్యూస్ :మహిళలు తమకు చట్టం కల్పించిన హక్కులపై అవగాహన పెంచుకోవడంతో పాటు వాటిని బాధ్యతాయుతంగా వినియోగించుకోవాలని న్యాయమూర్తులు సూచించారు. గురువారం తణుకు కోర్టు భవనాల సముదాయంలో నాలుగో అదనపు జిల్లా జడ్జి, మండల న్యాయసేవల సంస్థ చైర్‌పర్సన్ సుంకర శ్రీదేవి ఆదేశాల మేరకు సీనియర్ సివిల్ జడ్జి కె.కృష్ణ సత్యలత ఆధ్వర్యంలో వరకట్న నిషేధం, మహిళా హక్కులపై న్యాయవిజ్ఞాన సదస్సు నిర్వహించారు.ఈ సందర్భంగా న్యాయమూర్తులు మాట్లాడుతూ వరకట్న వేధింపులు, ఉద్యోగ ప్రదేశాల్లో మహిళలు ఎదుర్కొనే సమస్యలు, వాటి పరిష్కారానికి అందుబాటులో ఉన్న చట్టపరమైన మార్గాలను వివరించారు. ఆడపిల్లల పట్ల వివక్ష చూపకుండా విద్యలో సమాన అవకాశాలు కల్పించాలని సూచించారు. మహిళలు తమ హక్కులను సద్వినియోగం చేసుకోవాలే తప్ప దుర్వినియోగం చేయరాదన్నారు. న్యాయపరమైన సమస్యలు ఎదురైనప్పుడు మండల న్యాయసేవల సంస్థ ద్వారా ఉచిత న్యాయసహాయం, న్యాయసలహాలు పొందవచ్చని తెలిపారు.కార్యక్రమంలో మొదటి అదనపు జూనియర్ సివిల్ జడ్జి జి.స్వర్ణ, రెండో అదనపు జ్యుడీషియల్ మేజిస్ట్రేట్ కె.కృష్ణవేణి, అదనపు పబ్లిక్ ప్రాసిక్యూటర్ ఐడీఎల్ కిరణ్మయి, మహిళా న్యాయవాదులు, అంగన్వాడీ టీచర్లు, పారా లీగల్ వాలంటీర్లు, కౌర్ వెంకటేశ్వర్లు తదితరులు పాల్గొన్నారు.

 రిపోర్టర్ అని కుమార్ తణుకు పశ్చిమగోదావరి జిల్లా