మహిళా న్యాయవాదిపై హత్యాయత్నం.. నిందితుడికి ఐదేళ్ల జైలు

విజయవాడ క్రైం, మేజర్ న్యూస్ : మహిళా న్యాయవాదిపై హత్యాయత్నానికి పాల్పడిన కేసులో నిందితుడు బంకా శివకు ఐదేళ్ల కఠిన కారాగార శిక్ష, రూ.5 వేల జరిమానా విధిస్తూ 12వ అదనపు జిల్లా సెషన్స్ న్యాయమూర్తి జి. సుబ్రహ్మణ్యం సోమవారం తీర్పు వెల్లడించారు. 2017 అక్టోబర్ 10న కొత్తపేట పోలీస్ స్టేషన్ పరిధిలోని బంకా కామరాజు వారి వీధిలో న్యాయవాది ఇంట్లో ఉండగా నిందితుడు మరో ఇద్దరితో కలిసి వచ్చి ఆమెపై దాడి చేసి, కేసు వెనక్కి తీసుకోకపోతే చంపుతానని బెదిరించాడు. బాధితురాలి ఫిర్యాదుతో అప్పటి ఎస్‌ఐ శ్రీనివాసరావు కేసు నమోదు చేసి, అక్టోబర్ 13న నిందితుడిని అరెస్టు చేశారు. ఈ కేసులో 13 మంది సాక్షులను విచారించిన అనంతరం నేరం రుజువు కావడంతో న్యాయస్థానం శిక్ష విధించింది. ప్రాసిక్యూషన్ తరఫున అదనపు పబ్లిక్ ప్రాసిక్యూటర్ గీతా పూర్ణిమ వాదనలు వినిపించారు. ఇన్‌స్పెక్టర్ చిన్న కొండలరావు, సీఎంఎస్ ఇన్‌స్పెక్టర్ వాసవి, సిబ్బంది కేసు విచారణలో సహకరించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.