మచిలీపట్నంలో వరుస ఇళ్ల దొంగతనాల కేసుల ఛేదన.. నిందితుడి అరెస్ట్‌, చోరీ సొత్తు స్వాధీనం
మచిలీపట్నం, మేజర్ న్యూస్ : కృష్ణా జిల్లా ఎస్పీ వి. విద్యాసాగర్ నాయుడు, ఐపీఎస్ ఆదేశాల మేరకు మచిలీపట్నం పట్టణంలోని రాజుపేట ప్రాంతంలో జరిగిన వరుస ఇళ్ల దొంగతనాల కేసులను ఇనగుదురు పోలీసులు ఛేదించారు. ఈ కేసులకు సంబంధించి రాజుపేటకు చెందిన తిరుపతి ప్రవీణ్‌ (31)ను అక్టోబర్‌ 13న మధ్యాహ్నం 12 గంటలకు అదుపులోకి తీసుకున్నట్లు తెలిపారు. పోలీసుల దర్యాప్తులో నిందితుడు 2022 నుంచి తాళాలు వేసి ఉన్న ఇళ్లను లక్ష్యంగా చేసుకుని, తాళాలు పగలగొట్టి లోపలికి ప్రవేశించి, ఇనుప బీరువాలను ధ్వంసం చేసి నగదు, బంగారు, వెండి ఆభరణాలను అపహరించినట్లు వెల్లడైంది. దొంగిలించిన నగదుతో పాటు బంగారు ఆభరణాలను విక్రయించడం ద్వారా వచ్చిన డబ్బును ఆన్‌లైన్‌ క్రికెట్‌ బెట్టింగ్‌, జూదానికి వినియోగించినట్లు గుర్తించారు. అక్టోబర్‌ 13న మధ్యవర్తుల సమక్షంలో నిర్వహించిన నేర ఒప్పుదల, ఆస్తుల స్వాధీన ప్రక్రియలో వెండి కడ్డీలు రెండు, వెండి నాణేలు, బంగారు ఉంగరాలు, ఒక జత బంగారు చెవి దిద్దులు, లక్ష్మీదేవి రూపులు ఐదు, కరిగించిన బంగారం ముక్కతో పాటు చిన్నపిల్లల బంగారు ఉంగరాలను స్వాధీనం చేసుకున్నారు. ఈ సొత్తు క్రైమ్‌ నంబర్లు 178/2026, 203/2025, 57/2025, 151/2024, 92/2024, 191/2023, 243/2022 కేసులకు సంబంధించినదిగా గుర్తించారు. క్రైమ్‌ నంబర్‌ 30/2026తో సహా మొత్తం ఎనిమిది కేసుల్లో నిందితుడి ప్రమేయంపై తదుపరి దర్యాప్తు కొనసాగుతోందని పోలీసులు తెలిపారు. ఇళ్లకు తాళాలు వేసి బయటకు వెళ్లే సమయంలో తలుపులు, కిటికీలు సక్రమంగా మూసి ఉన్నాయో తనిఖీ చేసుకోవాలని, ఎక్కువ రోజులు ఇంటికి దూరంగా ఉండాల్సి వస్తే విశ్వసనీయమైన పొరుగువారికి సమాచారం ఇవ్వాలని, అనుమానాస్పద వ్యక్తులు లేదా కార్యకలాపాలు కనిపిస్తే వెంటనే పోలీసులకు తెలియజేయాలని ఇనగుదురు పోలీసులు సూచించారు.
స్టాఫ్ రిపోర్టర్: ✍️ ప్రేమ్ రాజ్, మచిలీపట్నం, కృష్ణాజిల్లా.
