మచిలీపట్నం మేయర్ పీఠంపై అబ్దుల్ అబీదా గురి!

మచిలీపట్నం మేజర్ న్యూస్: మచిలీపట్నం నగరపాలక సంస్థ మేయర్ పీఠంపై తెలుగుదేశం పార్టీలో రాజకీయ చర్చలు ఊపందుకుంటున్నాయి. రాబోయే మున్సిపల్ ఎన్నికల నేపథ్యంలో మేయర్ అభ్యర్థిత్వానికి సంబంధించి అబ్దుల్ అబీదా పేరు ప్రముఖంగా వినిపిస్తోంది. ఆమె భర్త డాక్టర్ హసీమ్ బేగ్‌కు పార్టీలో ఉన్న చురుకైన పాత్ర, కుటుంబానికి దశాబ్దాలుగా ఉన్న రాజకీయ నేపథ్యం, సామాజిక వర్గాలతో ఉన్న అనుబంధం అబీదా అభ్యర్థిత్వంపై ఆసక్తిని పెంచుతున్నాయి. అయితే, మేయర్ అభ్యర్థిత్వంపై పార్టీ అధిష్ఠానం నుంచి అధికారిక ప్రకటన వెలువడాల్సి ఉంది.

పార్టీ ఆవిర్భావం నుంచి కొనసాగుతున్న కుటుంబ ప్రస్థానం

తెలుగుదేశం పార్టీ ఆవిర్భావం నుంచి పార్టీతో అనుబంధం కొనసాగిస్తున్న కుటుంబంగా అబ్దుల్ అబీదా కుటుంబానికి స్థానిక రాజకీయాల్లో గుర్తింపు ఉంది. ఆమె మావయ్య కలీం బేగ్1982లో పార్టీ ఆవిర్భావం నాటి నుంచి టీడీపీలో కొనసాగుతూ, మచిలీపట్నంలోని ఇంగ్లీషుపాలెం ప్రాంతం నుంచి మూడుసార్లు కౌన్సిలర్‌గా ఎన్నికయ్యారు. పార్టీ అధికారంలో ఉన్నా, ప్రతిపక్షంలో ఉన్నా కార్యకర్తలకు అందుబాటులో ఉంటూ ప్రజా సమస్యలపై పనిచేశారని కుటుంబ వర్గాలు పేర్కొంటున్నాయి. అబీదా అత్తయ్య మొవ్వ పార్వతి అలియాస్ పర్వీన్ బేగం 2014 నుంచి 2019 వరకు ఇంగ్లీషుపాలెం వార్డు కౌన్సిలర్‌గా పనిచేశారు. ఆ సమయంలో వార్డు అభివృద్ధి, సంక్షేమ కార్యక్రమాల అమలులో భాగస్వాములయ్యారు. కుటుంబానికి ఉన్న ఈ రాజకీయ అనుభవం అబీదా అభ్యర్థిత్వానికి బలంగా నిలుస్తుందని ఆమె మద్దతుదారులు భావిస్తున్నారు.

యువతలో హసీమ్ బేగ్‌కు క్రియాశీలక పాత్ర

అబ్దుల్ అబీదా భర్త డాక్టర్ హసీమ్ బేగ్ ఆంధ్రప్రదేశ్ తెలుగుదేశం పార్టీ తెలుగు యువత రాష్ట్ర ఉపాధ్యక్షుడిగా బాధ్యతలు నిర్వహిస్తున్నారు. ఉమ్మడి కృష్ణా జిల్లాతో పాటు రాష్ట్రవ్యాప్తంగా యువతను పార్టీ కార్యక్రమాల్లో భాగస్వాములను చేయడంలో ఆయన చురుకుగా వ్యవహరిస్తున్నారని పార్టీ వర్గాలు చెబుతున్నాయి. గత వైసీపీ ప్రభుత్వ హయాంలో పార్టీ కార్యకర్తలకు అండగా నిలవడం, పార్టీ పిలుపునిచ్చిన నిరసనలు, ఆందోళన కార్యక్రమాల్లో పాల్గొనడం ద్వారా తనకంటూ గుర్తింపు తెచ్చుకున్నారని అనుచరులు పేర్కొంటున్నారు. పార్టీతో కుటుంబానికి ఉన్న దీర్ఘకాల అనుబంధం, హసీమ్ బేగ్ రాజకీయ చురుకుదనం కలిపి అబీదా అభ్యర్థిత్వానికి అనుకూల అంశాలుగా చర్చకు వస్తున్నాయి.

సామాజిక సమీకరణాలపైనా చర్చ

అబ్దుల్ అబీదా కుటుంబానికి బీసీడీ యాదవ సామాజిక వర్గంతో పాటు ముస్లిం మైనారిటీ వర్గాలతోనూ అనుబంధం ఉండటం రాజకీయంగా ప్రాధాన్యం సంతరించుకుంది. మచిలీపట్నం నగరంలో వివిధ సామాజిక వర్గాల మద్దతు కూడగట్టుకునే అవకాశాల నేపథ్యంలో ఈ అంశం చర్చనీయాంశంగా మారింది. పార్టీ కోసం దీర్ఘకాలంగా పనిచేసిన కుటుంబాలకు ప్రాధాన్యం ఇవ్వాలనే అభిప్రాయం కార్యకర్తల్లో ఉందని అబీదా మద్దతుదారులు చెబుతున్నారు. అయితే, అభ్యర్థి ఎంపికలో పార్టీ నాయకత్వం ఎలాంటి నిర్ణయం తీసుకుంటుందన్నది ఆసక్తికరంగా మారింది.

నగరాభివృద్ధిపై ప్రత్యేక దృష్టి పెడతామంటున్న అబీదా

మేయర్‌గా అవకాశం లభిస్తే మచిలీపట్నం నగరాభివృద్ధికి ప్రాధాన్యం ఇస్తానని అబ్దుల్ అబీదా పేర్కొంటున్నారు. మహిళా సాధికారత, మైనారిటీ సంక్షేమం, వెనుకబడిన వర్గాల సమస్యల పరిష్కారంతో పాటు తాగునీటి సరఫరా, మురుగునీటి పారుదల వ్యవస్థ ఆధునీకరణ, మౌలిక వసతుల అభివృద్ధిపై దృష్టి సారించాలనే లక్ష్యంతో ఉన్నట్లు ఆమె వర్గాలు తెలిపాయి. మచిలీపట్నం పోర్టు అభివృద్ధితో నగరానికి వచ్చే అవకాశాలను సద్వినియోగం చేసుకునేలా ప్రణాళికాబద్ధంగా ముందుకు సాగాల్సిన అవసరం ఉందని పేర్కొంటున్నారు.

అధిష్ఠానం నిర్ణయంపై ఉత్కంఠ

మచిలీపట్నం మేయర్ అభ్యర్థిత్వంపై తెలుగుదేశం పార్టీలో చర్చలు కొనసాగుతున్న నేపథ్యంలో అబ్దుల్ అబీదా పేరు తెరపైకి రావడం స్థానిక రాజకీయాల్లో ఆసక్తిని పెంచింది. కుటుంబ రాజకీయ నేపథ్యం, పార్టీ పట్ల దీర్ఘకాల అనుబంధం, హసీమ్ బేగ్ క్రియాశీలక పాత్ర, సామాజిక సమీకరణాలు ఆమెకు అనుకూల అంశాలుగా మద్దతుదారులు వివరిస్తున్నారు. అయితే, మేయర్ అభ్యర్థిగా ఎవరిని ఎంపిక చేయాలన్నది పార్టీ అధిష్ఠానం తీసుకునే నిర్ణయంపైనే ఆధారపడి ఉంటుంది. అధికారిక ప్రకటన వెలువడే వరకు మచిలీపట్నం మేయర్ పీఠం కోసం జరిగే రాజకీయ పరిణామాలపై ఉత్కంఠ కొనసాగనుంది.