కౌంటింగ్ సిబ్బందికి ఏమైంది..?

విజయనగరం బ్యూరో, సూర్య : విజయం ఎవరిది? ఓటమి ఎవరిని పలకరించనుంది? ప్రజాతీర్పు ఎటువైపు మొగ్గుచూపింది? ఈ ప్రశ్నలకు సమాధానాలు రావాల్సిన వేళ.. కౌంటింగ్ కేంద్రంలో మాత్రం అంతులేని జాప్యం నెలకొంది. గంటలు గడుస్తున్నా ఫలితాల జాడ లేకపోవడంతో అభ్యర్థులు, రాజకీయ పార్టీల నాయకులు, కార్యకర్తల్లో ఉత్కంఠ తారాస్థాయికి చేరింది. విజయనగరం నగరపాలక సంస్థ ఎన్నికల ఓట్ల లెక్కింపు ప్రక్రియ మొదటి నుంచీ మందకొడిగా సాగడం తీవ్ర చర్చనీయాంశంగా మారింది.
ఉదయం 8 గంటలకు ప్రారంభమైన ఓట్ల లెక్కింపు.. మధ్యాహ్నం దాటి సాయంత్రం సమీపిస్తున్నా ఫలితాల ప్రకటనకు నోచుకోలేదు. దాదాపు ఏడు గంటల సమయం గడిచినా అధికారికంగా ఫలితాలు వెల్లడించకపోవడం అందరినీ ఆశ్చర్యానికి గురిచేసింది. ఇంతసేపు కేవలం ఓట్ల విభజన, వాటిని కట్టలుగా కట్టే ప్రక్రియకే సరిపోయిందన్న పరిస్థితి నెలకొంది.
కౌంటింగ్ కేంద్రంలో ఏం జరుగుతోంది? ఫలితాల ప్రకటనకు ఇంత సమయం ఎందుకు పడుతోంది? అనే ప్రశ్నలు పోటీలో ఉన్న అభ్యర్థులను వేధిస్తున్నాయి. తమ రాజకీయ భవిష్యత్తును నిర్ణయించే ప్రజాతీర్పు కోసం అభ్యర్థులు, వారి అనుచరులు ఆత్రుతగా ఎదురుచూస్తున్నారు. మధ్యాహ్నం గడిచేకొద్దీ ఉత్కంఠ మరింత పెరిగింది. సాయంత్రం సమీపిస్తున్నా ఫలితాలు వెలువడకపోవడంతో రాజకీయ పార్టీల శ్రేణుల్లో ఆందోళన మొదలైంది. కౌంటింగ్ కేంద్రం లోపల జరుగుతున్న పరిణామాలపై బయట ఉన్న నాయకులు, కార్యకర్తలు ఆసక్తిగా ఆరా తీస్తున్నారు.
జేసీ అసహనం!
కౌంటింగ్‌లో జాప్యంపై అధికార యంత్రాంగం దృష్టి సారించింది. కౌంటింగ్ కేంద్రానికి చేరుకున్న జాయింట్ కలెక్టర్.. ఓట్ల లెక్కింపు ప్రక్రియను వేగవంతం చేయాలని అధికారులను ఆదేశించారు. ఫలితాల వెల్లడిలో ఆలస్యం ఎందుకు జరుగుతోందనే విషయాన్ని సంబంధిత అధికారులను అడిగి తెలుసుకున్నారు.

కౌంటింగ్ ప్రక్రియను మరింత వేగంగా పూర్తి చేసి, ఫలితాలను త్వరితగతిన ప్రకటించాలని స్పష్టం చేశారు. జాయింట్ కలెక్టర్ జోక్యంతోనైనా ఫలితాల ప్రకటనలో వేగం పెరుగుతుందా? అన్నది ఆసక్తికరంగా మారింది.
ప్రజాతీర్పు కోసం నిరీక్షణ
ఎన్నికల కౌంటింగ్ అంటే గంటల వ్యవధిలోనే ఫలితాలపై స్పష్టత రావాల్సి ఉంటుంది. అయితే విజయనగరం కార్పొరేషన్ ఎన్నికల లెక్కింపులో నెలకొన్న జాప్యం రాజకీయ వర్గాల్లో తీవ్ర ఉత్కంఠకు దారితీసింది.
ఓట్ల లెక్కింపు ప్రారంభమై గంటలు గడుస్తున్నా ఫలితాలు వెల్లడించకపోవడం.. కౌంటింగ్ కేంద్రంలో ఏం జరుగుతోందన్న సందేహాలకు తావిస్తోంది.