కళ్యాణదుర్గంలో పోలీసుల కార్డన్‌ అండ్‌ సెర్చ్‌ వాహనాల రికార్డుల తనిఖీ.. నిబంధనలు ఉల్లంఘించిన వారికి చలానాలు
అనంతపురం బ్యూరో : పట్టణంలో శాంతిభద్రతల పరిరక్షణ, నేరాల నియంత్రణ, అసాంఘిక కార్యకలాపాల కట్టడే లక్ష్యంగా కళ్యాణదుర్గం పోలీసులు ఆదివారం ఉదయం కార్డన్‌ అండ్‌ సెర్చ్‌ నిర్వహించారు.
కళ్యాణదుర్గం టౌన్‌ ఇన్‌స్పెక్టర్‌ వి. హరినాథ్‌, రూరల్ ఇన్‌స్పెక్టర్‌ వి. గంగాధర్‌ ఆధ్వర్యంలో బ్రహ్మసముద్రం, శెట్టూరు, కుందుర్పి పోలీస్‌ స్టేషన్ల సబ్‌ ఇన్‌స్పెక్టర్లు, సిబ్బంది కలిసి ఉదయం 6 గంటలకు పట్టణంలోని మారెంపల్లి, ఇందిరమ్మ కాలనీల్లో విస్తృతంగా తనిఖీలు చేపట్టారు.
ఈ సందర్భంగా ఆయా ప్రాంతాల్లో వాహనాలను ఆపి వాటికి సంబంధించిన రిజిస్ట్రేషన్‌, ఇతర అవసరమైన రికార్డులను పరిశీలించారు. సరైన రికార్డులు లేని వాహనాలను గుర్తించి, నిబంధనల ప్రకారం చలానాలు విధించారు.
పోలీసుల తనిఖీల ద్వారా వాహనదారుల్లో ట్రాఫిక్‌ నిబంధనలపై అవగాహన పెంచడంతో పాటు, అనుమానాస్పద కార్యకలాపాలపై నిఘా ఉంచేందుకు చర్యలు చేపట్టారు. ప్రజల భద్రతకు ప్రాధాన్యమిస్తూ పోలీసు శాఖ తనిఖీలను కొనసాగిస్తోంది.
రిపోర్టర్ : సుధా మోహన్, కళ్యాణదుర్గం ఇన్చార్జ్, కళ్యాణదుర్గం.
