కార్పొరేషన్ లో నామినేషన్ల పరిశీలన

విజయనగరం, సూర్య : నగరపాలక సంస్థ ఎన్నికల ప్రక్రియలో మరో అంకం పూర్తయింది. మూడు రోజుల పాటు సాగిన నామినేషన్ల స్వీకరణలో వచ్చిన 450 వార్డు సభ్యుల నామినేషన్లు, 23 మేయర్ అభ్యర్థుల నామినేషన్ల పరిశీలన ప్రక్రియ ఈరోజు చేపట్టారు. నగరపాలక సంస్థ కార్యాలయంలో ఉన్న మొదటి, రెండవ అంతస్థులలో నామినేషన్ల పరిశీలన ప్రక్రియను చేపట్టారు. 17 కౌంటర్లలో రిటర్నింగ్ అధికారులు అభ్యర్థుల సమక్షంలో నామినేషన్లను పరిశీలించారు. సరైన ధృవపత్రాలు జతపరచని నలుగురు నామినేషన్లను ఎన్నికల అధికారులు తిరస్కరించారు. దీంతో 447 మంది వార్డు సభ్యుల నామినేషన్లు, 22 మంది మేయర్ అభ్యర్థుల నామినేషన్లు సక్రమమైనవిగా గుర్తించారు. సక్రమంగా నామినేషన్ వేసిన అభ్యర్థులు ఉపసంహరించుకునేందుకు ఈనెల 21 వరకు ఎన్నికల సంఘం గడువు ఇచ్చిన విషయం విదితమే. నామినేషన్ల ఉపసంహరణ అనంతరం అదేరోజు అభ్యర్థుల తుది జాబితా ప్రకటించనున్నట్లు కమిషనర్ బాలస్వామి తెలిపారు. నామినేషన్ల పరిశీలన ప్రక్రియను ఎన్నికల అధికారి తేజ్ భరత్ పరిశీలించారు. 12వ వార్డుకు సంబంధించి కొర్రాయి జగదీష్, 30 వ వార్డు కు సంబంధించి గేయామృత, 50వ వార్డుకు సంబంధించి మత్స భవాని సక్రమమైన ధ్రువపత్రాలు అందజేయని కారణంగా వాటిని తిరస్కరించారు. అలాగే మేయర్ అభ్యర్థిగా నామినేషన్ వేసిన గేయామృత అఫిడవిట్ అందజేయని కారణంగా ఆమె నామినేషను రిటర్నింగ్ అధికారులు తిరస్కరించారు.

రిపోర్టర్ :  డేవిడ్ రాజు, విజయనగరం.