జడ్పీటీసీ అభ్యర్థిగా అవకాశం కల్పించండి: ఎంపీ హరీష్ బాలయోగికి ఆర్యవైశ్య కార్పొరేషన్ డైరెక్టర్ కంకటాల రామం వినతి

సూర్య ఆంధ్రప్రదేశ్ డెస్క్: డాక్టర్ బి.ఆర్. అంబేద్కర్ కోనసీమ జిల్లాలో రాబోయే స్థానిక సంస్థల ఎన్నికల సందడి అప్పుడే ప్రారంభమైంది. స్థానిక సంస్థల ఎన్నికల్లో జిల్లా పరిషత్ ప్రాదేశిక నియోజకవర్గ (జడ్పీటీసీ) అభ్యర్థిగా పోటీ చేసేందుకు తనకు తగిన అవకాశం కల్పించాలని రాష్ట్ర ఆర్యవైశ్య కార్పొరేషన్ డైరెక్టర్ కంకటాల రామం కోరారు. ఈ మేరకు మంగళవారం అమలాపురం పార్లమెంట్ సభ్యులు గంటి హరీష్ బాలయోగిని ఆయన మర్యాదపూర్వకంగా కలిసి ఒక వినతిపత్రాన్ని సమర్పించారు.

ఈ సందర్భంగా కంకటాల రామం ఎంపీతో మాట్లాడుతూ, తాను 1984వ సంవత్సరం నుంచి తెలుగుదేశం పార్టీని అంటిపెట్టుకుని అంకితభావంతో సేవలందిస్తున్నానని గుర్తుచేశారు. పార్టీ ఆదేశించిన ప్రతి బాధ్యతను సమర్థవంతంగా నిర్వహిస్తూ, క్షేత్రస్థాయిలో పార్టీ బలోపేతానికి నిరంతరం కృషి చేస్తున్నట్లు వివరించారు. దశాబ్దాలుగా పార్టీకి, ప్రజలకు నిస్వార్థంగా అందించిన సేవలను పార్టీ అధిష్టానం గుర్తించాలని ఆయన విజ్ఞప్తి చేశారు.

పార్టీ విధేయత, ప్రజాసేవను పరిగణనలోకి తీసుకుని రాబోయే స్థానిక సంస్థల ఎన్నికల్లో జిల్లాలోని ఏ ప్రాంతం నుంచైనా జడ్పీటీసీ అభ్యర్థిగా బరిలోకి దిగేందుకు అవకాశం కల్పించాలని కోరారు. పార్టీ అవకాశం ఇస్తే గెలుపే ధ్యేయంగా పనిచేసి ప్రజాసేవలో ముందుంటానని రామం స్పష్టం చేశారు. ఈ వినతిపై ఎంపీ గంటి హరీష్ బాలయోగి సానుకూలంగా స్పందిస్తూ పార్టీ సీనియర్ కార్యకర్తల సేవలకు ఎల్లప్పుడూ సముచిత స్థానం ఉంటుందని భరోసా ఇచ్చారు.