పెండింగ్‌ కేసుల దర్యాప్తును వేగవంతం చేయాలి: ఎస్పీ అద్నాన్ నయీం అస్మి

భీమవరం, మేజర్ న్యూస్: జిల్లాలో శాంతిభద్రతలను మరింత బలోపేతం చేసి, సాంకేతిక పరిజ్ఞానంతో నేరాలను నియంత్రించాలని జిల్లా ఎస్పీ అద్నాన్ నయీం అస్మి పోలీసు అధికారులను ఆదేశించారు. మంగళవారం గొల్లలకోడేరులోని జిల్లా పోలీసు కార్యాలయంలో నెలవారీ నేర సమీక్షా సమావేశం నిర్వహించారు.పెండింగ్ కేసుల దర్యాప్తును వేగవంతం చేయాలని, ముఖ్యంగా ఆస్తి నేరాల్లో చోరీ సొత్తు రికవరీపై ప్రత్యేక దృష్టి పెట్టాలని సూచించారు. NDPS, ఎస్సీ/ఎస్టీ అట్రాసిటీ, పోక్సో, మహిళలపై నేరాల కేసులను ప్రాధాన్యతతో దర్యాప్తు చేయాలన్నారు.e-Office, e-Deployment, Cri-MAC, ICJS, CCTNS వంటి సాంకేతిక వ్యవస్థలను సమర్థవంతంగా వినియోగించాలని, కేస్ డైరీలను ఆన్‌లైన్‌లో క్రమం తప్పకుండా నిర్వహించాలని ఆదేశించారు. శాస్త్రీయ ఆధారాలతో పక్కా చార్జిషీట్లు దాఖలు చేసి నేరస్థులకు శిక్ష పడేలా చర్యలు తీసుకోవాలన్నారు.ప్రజా ఫిర్యాదులపై మానవీయంగా, బాధ్యతాయుతంగా స్పందించి ప్రజల్లో పోలీసులపై నమ్మకం పెంచాలని సూచించారు. కోర్టు సమన్లు, నాన్‌బెయిలబుల్ వారెంట్ల అమలులో జాప్యం లేకుండా చూడాలని ఆదేశించారు. సమావేశంలో అదనపు ఎస్పీ డి. విశ్వనాథ్, డీఎస్పీలు రఘువీర్ విష్ణు, ఎం. సుధాకర్, యు. రవిచంద్ర, సీఐలు, ఎస్సైలు, ఇతర పోలీసు అధికారులు పాల్గొన్నారు.

 శ్రీనివాస్ భీమవరం