జడ్పీహెచ్ఎస్ పాఠశాలను ఆకస్మికంగా తనిఖీ చేసిన జిల్లా విద్యాశాఖ అధికారి

కొత్తవలస, సూర్య : స్థానిక పట్టణంలోన జిల్లా పరిషత్ పాఠశాలను జిల్లా విద్యాశాఖ అధికారి యు. మాణిక్యాల నాయుడు బుధవారం ఆకస్మికంగా తనిఖీ చేశారు. ఈ సందర్భంగా పాఠశాలలో నిర్వహిస్తున్న సంగ్రహణాత్మక నిర్మాణ పరీక్షల తీరును పరిశీలించారు. తరగతి గదులను సందర్శించి విద్యార్థుల విద్యా ప్రమాణాలను, పరీక్షల నిర్వహణ విధానాన్ని అడిగి తెలుసుకున్నారు. పాఠశాలలోని రికార్డులను పరిశీలించి ఉపాధ్యాయులకు పలు సూచనలు చేశారు. అనంతరం డొక్కా సీతమ్మ మధ్యాహ్నం భోజనం పథకాన్ని పరిశీలించి సంతృప్తి చెందారు. అనంతరం పాఠశాల ఆటస్థలంలో అనధికారికంగా ఏర్పాటు చేసిన చిన్న చిన్న బడ్డీలను వెంటనే తొలగించాలని ఆదేశించారు. పాఠశాల ప్రహరీ గోడ నిర్మాణానికి అవసరమైన నిధుల సమీకరణకు చర్యలు చేపట్టాలని సూచించారు. ప్రతి ఉపాధ్యాయుడు పదో తరగతి విద్యార్థులను దత్తత తీసుకుని, వారిపై ప్రత్యేక శ్రద్ధ చూపాలని తెలిపారు. విద్యార్థుల విద్యా సామర్థ్యాన్ని పెంపొందించేందుకు ఉపాధ్యాయులు సమష్టిగా కృషి చేయాలని, పదో తరగతి ఫలితాల్లో ఉత్తమ ప్రతిభ కనబరిచేలా ప్రణాళికాబద్ధంగా బోధన సాగించాలని జిల్లా విద్యాశాఖ అధికారి సూచించారు. ఆకస్మిక తనిఖీలో వారితో పాటు మండల విద్యాశాఖ అధికారులు జి శ్రీదేవి,బి శ్రీనివాస్ రావు పాఠశాల ఇంచార్జ్ ప్రధానోపాధ్యాయులు కె .శేషగిరిరావు ఉపాధ్యాయులు డాక్టర్.బి. గోవింద నాయుడు, బండారు మోహన్ రావు,వంగపండు అప్పారావు  ఏ గిరిజా రమణారావు సన్యాసిరావు, కోటేశ్వరరావు, సత్యారావు తదితరులు పాల్గొన్నారు.