ఇంద్రకీలాద్రిపై శాస్త్రోక్తంగా ఆకాశ దీపం ఏర్పాటు

ఇంద్రకీలాద్రి మేజర్ న్యూస్ : పరాభవ నామ సంవత్సర కార్తీక మాస ప్రారంభాన్ని పురస్కరించుకుని సోమవారం సాయంత్రం ప్రదోష వేళ దుర్గా మల్లేశ్వర స్వామివార్ల దేవస్థానంలో ఆకాశ దీపం ఏర్పాటు కార్యక్రమాన్ని శాస్త్రోక్తంగా నిర్వహించారు. కనకదుర్గమ్మ, మల్లేశ్వర స్వామివార్ల సన్నిధులతో పాటు నటరాజ స్వామివారి ఆలయంలో స్థానాచార్యుల ఆధ్వర్యంలో వేద మంత్రోచ్ఛారణల నడుమ ఈ కార్యక్రమం వైభవంగా జరిగింది. ఈ పూజా కార్యక్రమాల్లో దేవస్థానం ట్రస్ట్ బోర్డు చైర్మన్ బొర్రా రాధాకృష్ణ (గాంధీ), కార్యనిర్వహణాధికారి వి.కె. శీనా నాయక్ పాల్గొని ప్రత్యేక పూజలు నిర్వహించారు. కార్తీక మాసంలో ప్రదోష వేళ ఆకాశ దీపాన్ని దర్శించుకోవడం వల్ల సర్వపాపాలు నశించి, అకాల మృత్యు భయాలు తొలగిపోవడంతో పాటు సమస్త శుభాలు, ఆయురారోగ్య ఐశ్వర్యాలు కలుగుతాయని అర్చక స్వాములు తెలిపారు. సకల లోకాలకు శాంతి, సౌభాగ్యాలు కలగాలని ఆకాంక్షిస్తూ శాస్త్రోక్తంగా వెలిగించిన దివ్య దీపాన్ని ఆలయ ధ్వజస్తంభానికి ఏర్పాటు చేసినట్లు పేర్కొన్నారు. కార్తీక మాసాన్ని పురస్కరించుకుని నెల రోజుల పాటు ఇంద్రకీలాద్రిపై నిత్యం నిర్వహించే విశేష అభిషేకాలు, బిల్వార్చనలు, లక్ష్మీ గణపతి పంచాక్షరీ పారాయణాలు తదితర వైదిక సేవల్లో భక్తులు పాల్గొనేందుకు అన్ని ఏర్పాట్లు పూర్తి చేసినట్లు ఈవో శీనా నాయక్ వెల్లడించారు. ఈ కార్యక్రమంలో దేవస్థానం అర్చకులు, వైదిక కమిటీ సభ్యులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.