హోల్డింగ్ ఏరియాల్లో భక్తులకు స్వచ్ఛమైన తాగునీరు, పరిశుభ్రమైన వాతావరణం

విజయవాడ కార్పొరేషన్ మేజర్ న్యూస్: దసరా శరన్నవరాత్రి ఉత్సవాలకు అమ్మవారి దర్శనం కోసం పెద్ద సంఖ్యలో తరలివస్తున్న భక్తులకు హోల్డింగ్ ఏరియాల్లో స్వచ్ఛమైన తాగునీరు, పరిశుభ్రమైన వాతావరణం కల్పిస్తున్నట్లు విజయవాడ నగరపాలక సంస్థ కమిషనర్ ధ్యానచంద్ర తెలిపారు. బుధవారం సాయంత్రం వినాయకుని గుడి, కెనాల్ రోడ్, వన్‌టౌన్ ప్రాంతాల్లోని హోల్డింగ్ ఏరియాలను ఆయన క్షేత్రస్థాయిలో సందర్శించి భక్తులకు కల్పిస్తున్న సౌకర్యాలను పరిశీలించారు. భక్తుల రద్దీకి అనుగుణంగా నిరంతర తాగునీటి సదుపాయం అందుబాటులో ఉంచడంతోపాటు, వినియోగించిన నీటి సీసాలు, ఇతర వ్యర్థాలను సేకరించేందుకు చెత్తకుండీలు ఏర్పాటు చేసి పారిశుద్ధ్య నిర్వహణ చేపడుతున్నట్లు వివరించారు. హోల్డింగ్ ఏరియాల్లో భక్తుల రాకపోకలు నిరంతరం కొనసాగుతున్నప్పటికీ, ప్రతి విభాగంలో పరిసరాలను పరిశుభ్రంగా ఉంచేందుకు సిబ్బంది నిరంతరం పనిచేస్తున్నారని తెలిపారు. ఒక విడత భక్తులు ముందుకు సాగిన వెంటనే తదుపరి విడత భక్తులకు కూడా శుభ్రమైన పరిసరాలు అందుబాటులో ఉండేలా చర్యలు తీసుకుంటున్నట్లు పేర్కొన్నారు. భక్తుల ఆరోగ్యం, సౌకర్యాలకు ప్రాధాన్యమిస్తూ మెరుగైన పారిశుద్ధ్య నిర్వహణ కొనసాగించాలని అధికారులకు సూచించారు. ఈ పర్యటనలో చీఫ్ ఇంజినీర్ పి. సత్యకుమారి, ప్రధాన వైద్య ఆరోగ్య అధికారి డా. సి.హెచ్. నిర్మల గ్లోరీ, దేవాదాయ శాఖ కార్యనిర్వాహక ఇంజినీర్ రమాదేవి, సంబంధిత సిబ్బంది పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.