గ్రామీణులకు మెరుగైన వైద్యమే కూటమి ప్రభుత్వ లక్ష్యం...

•  ప్రాథమిక వైద్య రంగానికి అధిక ప్రాధాన్యత.
• ఎమ్మెల్యే బగ్గు రమణమూర్తి

శ్రీకాకుళం, అక్టోబర్ 6 మేజర్ న్యూస్ : గ్రామీణ ప్రాంతాల్లోని పేద, మధ్యతరగతి ప్రజలకు నాణ్యమైన వైద్య సేవలను వారి ఇంటి గుమ్మం వద్దకే అందించడమే కూటమి ప్రభుత్వ లక్ష్యమని నరసన్నపేట ఎమ్మెల్యే బగ్గు రమణమూర్తి అన్నారు. ఆరోగ్యవంతమైన సమాజ నిర్మాణానికి ప్రాథమిక వైద్య రంగాన్ని బలోపేతం చేయడంపై ప్రభుత్వం ప్రత్యేక దృష్టి సారించిందని తెలిపారు.

శ్రీకాకుళం జిల్లా పరిషత్ సమావేశ మందిరంలో మంగళవారం నిర్వహించిన ‘ఆయుష్మాన్ ఆరోగ్య మందిర్’ (విలేజ్ హెల్త్ క్లినిక్స్) వర్చువల్ ప్రారంభోత్సవ కార్యక్రమంలో ఎమ్మెల్యే బగ్గు రమణమూర్తి పాల్గొన్నారు. జిల్లా కలెక్టర్, శ్రీకాకుళం ఎమ్మెల్యే గొండు శంకర్, జిల్లా అధికారులతో కలిసి ఆయన శిలాఫలకాలను ఆవిష్కరించారు.

ఈ సందర్భంగా ఎమ్మెల్యే మాట్లాడుతూ గ్రామీణ ప్రజలకు ప్రాథమిక వైద్య సేవలు మరింత చేరువ చేయడంలో భాగంగా విలేజ్ హెల్త్ క్లినిక్‌లను ‘ఆయుష్మాన్ ఆరోగ్య మందిర్’లుగా తీర్చిదిద్దుతున్నట్లు చెప్పారు. ప్రజలకు అవసరమైన వైద్య సేవలు స్థానికంగానే అందుబాటులోకి రావడంతో దూర ప్రాంతాలకు వెళ్లాల్సిన ఇబ్బందులు తగ్గుతాయని పేర్కొన్నారు.

ప్రాథమిక దశలోనే వ్యాధులను గుర్తించి తగిన వైద్య సేవలు అందించడం ద్వారా ప్రజల ఆరోగ్యాన్ని కాపాడేందుకు ఈ కేంద్రాలు ఉపయోగపడతాయని ఆయన అన్నారు. గ్రామీణ ప్రాంతాల్లో వైద్య మౌలిక వసతులను మరింత బలోపేతం చేసేందుకు ప్రభుత్వం చర్యలు చేపడుతోందని తెలిపారు.
కార్యక్రమంలో జిల్లా వైద్య ఆరోగ్యశాఖ అధికారి నరేష్‌కుమార్, ఆరోగ్య కార్యకర్తలు, వైద్య సిబ్బంది, సంబంధిత అధికారులు పాల్గొన్నారు.