గ్రామ పంచాయతీ ఎన్నికల్లో శత శాతం కూటమిదే విజయం: ఎమ్మెల్యే

చీపురుపల్లి, సూర్య :  రైతులకు ఎలాంటి ఇబ్బందులు కలగకుండా ధాన్యం సేకరణ ప్రక్రియను పకడ్బందీగా నిర్వహించేందుకు అన్ని ఏర్పాట్లు చేస్తున్నామని  ఎమ్మెల్యే కిమిడి కళా వెంకటరావు తెలిపారు. స్థానిక పార్టీ కార్యాలయంలో బుధవారం నిర్వహించిన విలేకరుల సమావేశంలో ఆయన మాట్లాడారు. గ్రామ పంచాయతీ ఎన్నికల్లో నూటికి నూరు శాతం విజయం సాధిస్తామని కళా వెంకటరావు ధీమా వ్యక్తం చేశారు. గత ఎన్నికల్లో తలెత్తిన చిన్నపాటి లోపాలను సరిదిద్దుకొని ముందుకు సాగుతున్నామని తెలిపారు. పార్టీ రహితంగా జరగనున్న ఈ ఎన్నికల్లో కూడా స్థానికంగా ఉన్న పరిస్థితులు, అవకాశాలను బట్టి కూటమిలోని ఇతర పార్టీలకు అవకాశం కల్పిస్తున్నామని వెల్లడించారు. అన్ని అంశాలను పరిగణనలోకి తీసుకొని గ్రామ పంచాయతీ ఎన్నికల్లో విజయం సాధించేందుకు ప్రణాళికాబద్ధంగా ముందుకు సాగుతున్నామని తెలిపారు. పార్టీలో జరిగిన చర్చల అనంతరం గ్రామస్థాయి నాయకులు, కార్యకర్తల అభిప్రాయాలను పరిగణనలోకి తీసుకొని అభ్యర్థుల ఎంపికకు ప్రాధాన్యత ఇస్తున్నట్లు వివరించారు. జిల్లాలో ధాన్యం సేకరణకు సంబంధించి జిల్లా కలెక్టర్‌తో పాటు సివిల్ సప్లై అధికారులు పూర్తిస్థాయిలో సిద్ధంగా ఉన్నారని తెలిపారు. రైతులు పండించిన ధాన్యాన్ని సకాలంలో కొనుగోలు చేయడంతో పాటు, కొనుగోలు ప్రక్రియలో రైతులకు ఎలాంటి ఇబ్బందులు తలెత్తకుండా అవసరమైన చర్యలు తీసుకుంటున్నట్లు పేర్కొన్నారు. ధాన్యం సేకరించిన 24 గంటల్లోనే రైతుల బ్యాంకు ఖాతాల్లో నగదు జమ చేసేలా చర్యలు తీసుకుంటున్నామని స్పష్టం చేశారు. రైతులు ధాన్యం విక్రయించిన తర్వాత చెల్లింపుల కోసం నిరీక్షించాల్సిన పరిస్థితి లేకుండా సకాలంలో నగదు అందించేందుకు ప్రభుత్వం చర్యలు చేపడుతోందని తెలిపారు. అలాగే గత సంవత్సరం మాదిరిగానే ఈ ఏడాది కూడా సొసైటీలు, ఉత్పత్తిదారుల సంఘాలు, వెలుగు సంఘాలకు అవసరమైన వెసులుబాటు కల్పిస్తామని వెల్లడించారు. ధాన్యం సేకరణలో రైతులకు మరింత సౌకర్యవంతమైన విధానాన్ని అమలు చేసేందుకు సంబంధిత అధికారులు సమన్వయంతో పనిచేస్తారని పేర్కొన్నారు.
రైతుల పంటకు గిట్టుబాటు ధర, సకాలంలో ధాన్యం కొనుగోలు, వేగవంతమైన చెల్లింపులు అందించడం ప్రభుత్వ బాధ్యతగా భావిస్తున్నామని తెలిపారు. రైతుల బాగోగులు, వ్యవసాయ రంగ అభివృద్ధి ముఖ్యమంత్రి నారా చంద్రబాబు నాయుడుకి అత్యంత ప్రాధాన్యత కలిగిన అంశాలని ఎమ్మెల్యే  పేర్కొన్నారు.