గొట్లూరులో 8 సెంట్ల స్థల వివాదంపై మాల సంఘాల పోరాటం

అనంతపురం బ్యూరో

గొట్లూరులో 8 సెంట్ల స్థల వివాదంపై మాల సంఘాల పోరాటం

పల్లె పిలుపు–మాలల మేలుకొలుపు’ కార్యక్రమంలో భాగంగా గొట్లూరు గ్రామంలో ఎస్సీ కాలనీకి సంబంధించిన 8 సెంట్ల స్థల వివాదంపై మాల సంఘాల నాయకులు, బాధిత కుటుంబాలు రెవెన్యూ అధికారులను ఆశ్రయించారు. 1983 నుంచి ఎస్సీ కాలనీకి కేటాయించిన స్థలంలో 8 సెంట్లను బీసీ బోయ సామాజిక వర్గానికి చెందిన ఐదు కుటుంబాలు ఆక్రమించి నిర్మాణాలు చేపట్టారని మాల సంఘాల నాయకులు ఆరోపించారు.ఈ సమస్యపై సుమారు 100 మంది ధర్మవరం ఆర్డీవోను కలిసి వినతిపత్రం సమర్పించారు. సమస్యను పరిశీలించిన ఆర్డీవో, తహసీల్దార్, సర్వేయర్, వీఆర్వోలతో చర్చించి, సెప్టెంబర్ 26లోపు సంబంధిత కుటుంబాలను పిలిపించి చట్టపరంగా సమస్యను పరిష్కరిస్తామని హామీ ఇచ్చినట్లు నాయకులు తెలిపారు.దాదాపు 40 ఏళ్లుగా ఈ స్థలం కోసం పోరాడుతున్నామని, అక్కడ కమ్యూనిటీ భవనం, అంబేద్కర్ డిజిటల్ లైబ్రరీ ఏర్పాటు చేయాలనే లక్ష్యంతో ఉన్నామని వారు పేర్కొన్నారు. బాధిత కుటుంబాలకు అండగా ఉంటామని, అవసరమైతే న్యాయపోరాటం చేస్తామని మాల సంఘాల నాయకులు తెలిపారు.కార్యక్రమంలో డాక్టర్ కోట్ల గంగాధర్, డాక్టర్ చెరుకూరి గంగులయ్య, ఎం.ఎన్. మూర్తి, డాక్టర్ గడ్డం ముత్యాలప్ప, డాక్టర్ గుమ్మగుట్ట ఈశ్వరయ్య, సుగుమంచి శ్రీనివాసులు, జూటూరు మహేంద్ర, సోమ కుమార్, కోట్ల మల్లికార్జున తదితరులు పాల్గొన్నారు.