మిడిల్ ఈస్ట్లో తీవ్ర ఉద్రిక్తతలు
సౌదీకి అండగా పాకిస్థాన్, టర్కీ.. హౌతీల దాడితో రగులుతున్న పోరు
సూర్య అంతర్జాతీయ డెస్క్: పశ్చిమాసియాలో దాడులు తీవ్రరూపం దాల్చడంతో మిడిల్ ఈస్ట్ ప్రాంతం తీవ్ర ఉద్రిక్తతలతో రగులుతోంది. యెమెన్కు చెందిన హౌతీ తిరుగుబాటుదారులు సౌదీ అరేబియా భూభాగమే లక్ష్యంగా క్షిపణులు, డ్రోన్లతో విరుచుకుపడుతుండటంతో పరిస్థితి అత్యంత ఆందోళనకరంగా మారింది. ఈ పరిణామాల నేపథ్యంలో సౌదీ అరేబియాకు రక్షణగా నిలిచేందుకు పాకిస్థాన్, టర్కీ దేశాలు ముందుకు వచ్చాయి. మక్కా ఉమ్మడి రక్షణ ఒప్పందంలో భాగంగా మూడో దేశంపై దాడి జరిగితే అందరిపై జరిగిన దాడిగా భావిస్తూ, సౌదీకి పూర్తి సైనిక మద్దతు అందించేందుకు ఆయా దేశాల విదేశాంగ మంత్రులు అత్యవసరంగా భేటీ అయ్యారు. సౌదీ రక్షణ వ్యూహాలను ఖరారు చేసేందుకు త్వరలోనే మూడు దేశాల త్రివిధ దళాధిపతుల సమావేశం కూడా జరగనుంది.
రెడ్ సీ ప్రాంతంలోని ముడిచమురు రవాణా రంగాన్ని దెబ్బతీసేలా హౌతీ తిరుగుబాటుదారులు పదుల సంఖ్యలో క్షిపణులు, డ్రోన్లను ప్రయోగించగా, వాటిలో ఆరు బాలిస్టిక్ క్షిపణులను సౌదీ వైమానిక దళాలు గాల్లోనే ధ్వంసం చేశాయి. ఈ తీవ్ర దాడుల నేపథ్యంలో పవిత్ర నగరమైన మక్కాతో పాటు జిద్దా, యాంబూ చమురు పోర్టు ప్రాంతాల్లో సౌదీ ప్రభుత్వం అత్యవసర హెచ్చరికలు జారీ చేసింది. తమ దేశ సార్వభౌమత్వాన్ని, పవిత్ర నగరాలను కాపాడుకోవడానికి ప్రాణ త్యాగానికైనా సిద్ధపడాలని సౌదీ అరేబియా గ్రాండ్ ముఫ్తీ తమ దేశ రక్షణ దళాలకు పిలుపునిచ్చారు. అమెరికా, ఇజ్రాయెల్ యుద్ధ వాతావరణం మధ్య హౌతీలు సౌదీ ఇంధన రవాణాను లక్ష్యంగా చేసుకోవడం ప్రపంచ ఆర్థిక వ్యవస్థను సైతం ఆందోళనకు గురిచేస్తోంది.
మరొకవైపు అంతర్జాతీయ స్థాయిలో దౌత్యపరమైన చర్చలు కూడా ముమ్మరంగా సాగుతున్నాయి. ఇరాన్ అధ్యక్షుడు మసూద్ పెజెష్కియాన్ ఒక అమెరికన్ టీవీ ఇంటర్వ్యూలో మాట్లాడుతూ, హౌతీలు స్వతంత్రంగా వ్యవహరిస్తున్నారని, వారి దాడులతో ఇరాన్కు సంబంధం లేదని స్పష్టం చేశారు. అదే సమయంలో పర్షియన్ గల్ఫ్లోని అత్యంత కీలకమైన హార్ముజ్ జలసంధిని తిరిగి తెరవడానికి ఇరాన్ విదేశాంగ మంత్రి అబ్బాస్ అరాగ్చీ కొన్ని ప్రతిపాదనలను అమెరికాకు పంపారు. ఇరాన్పై విధించిన ఆంక్షలు తొలగించి, ఓడరేవులపై దిగ్బంధనాన్ని ఎత్తివేస్తే యుద్ధాన్ని ముగించేందుకు సిద్ధంగా ఉన్నామని ప్రకటించారు. అమెరికా ఆంక్షల ప్రభావంతో పొరుగు దేశాలు ఇరాన్ విమాన సర్వీసులపై నిషేధం విధిస్తుండటంతో ఇరాన్ తీవ్ర ఆర్థిక దిగ్బంధనాన్ని ఎదుర్కొంటోంది.
