హార్ముజ్ జలసంధి పునఃప్రారంభానికి అమెరికా, ఇరాన్ చర్చలు

సూర్య అంతర్జాతీయ డెస్క్: పశ్చిమాసియాలో ఉద్రిక్తతలను తగ్గించే దిశగా అమెరికా మరియు ఇరాన్ దేశాలు కీలక అడుగులు వేస్తున్నట్లు సమాచారం. తీవ్ర వివాదానికి ముగింపు పలికేందుకు రెండు దేశాలు విడతల వారీ ఒప్పందంపై చర్చలు జరుపుతున్నట్లు అంతర్జాతీయ కథనాలు పేర్కొంటున్నాయి. దీనిలో భాగంగా తమపై విధించిన ఆర్థిక అంక్షలు మరియు అమెరికా దిగ్బంధనాన్ని ఎత్తివేస్తే కీలకమైన హార్ముజ్ జలసంధిని తిరిగి ప్రారంభించేందుకు సిద్ధంగా ఉన్నామని ఇరాన్ ప్రతిపాదించినట్లు తెలుస్తోంది.

మధ్యవర్తుల ద్వారా ఈ ప్రతిపాదనను పంపినట్లు ఇరాన్ విదేశాంగ మంత్రి అబ్బాస్ అరాగ్చీ స్పష్టం చేశారు. ఒప్పందం కుదరాలంటే ఏడు రోజుల్లోగా అన్ని సరిహద్దుల్లోనూ పోరాటాలను నిలిపివేయాలని, ఇరాన్ పోర్టులపై అమెరికా విధించిన దిగ్బంధనాన్ని ఎత్తివేయాలని ఆయన షరతులు విధించారు. వీటితో పాటు స్తంభింపజేసిన ఇరాన్ నిధులను విడుదల చేయడంతో పాటు చమురు ఎగుమతులపై ఆంక్షల మినహాయింపు ఇవ్వాలని కోరారు. మరోవైపు అమెరికా అధ్యక్షుడు డోనాల్డ్ ట్రంప్‌తో చర్చలకు సిద్ధంగా ఉన్నామని ఇరాన్ అధ్యక్షుడు మసూద్ పెజెష్కియాన్ వెల్లడించారు. తాము పోరాటాన్ని కొనసాగించాలని అనుకోవడం లేదని పేర్కొన్న ఆయన, యెమెన్‌లోని హౌతీ తిరుగుబాటుదారులతో తమకు ఎలాంటి వ్యవస్థాగత భాగస్వామ్యం లేదని స్పష్టం చేశారు.

ఇదిలా ఉండగా, హౌతీల దాడుల నేపథ్యంతో సౌదీ అరేబియాకు మద్దతుగా నిలిచేందుకు సౌదీ, టర్కీ మరియు పాకిస్థాన్ దేశాలు అత్యవసర సమావేశం నిర్వహించనున్నాయి. మక్కా ఉమ్మడి రక్షణ ఒప్పందం ప్రకారం ఏ ఒక్క దేశంపై దాడి జరిగినా అది అందరిపై జరిగిన దాడిగా భావిస్తామని సౌదీ విదేశాంగ శాఖ తెలిపింది. అలాగే, అమెరికా ఆంక్షల నేపథ్యంలో యుఏఈ గురువారం నుంచి ఇరాన్ విమానాల రాకపోకలను నిలిపివేసింది. పశ్చిమాసియా ప్రాంతంలో చోటుచేసుకుంటున్న ఈ పరిణామాలు అంతర్జాతీయంగా తీవ్ర ఆసక్తిని రేకెత్తిస్తున్నాయి.